Selmana de Ganancies pal Ibex y pal euru

L´Ibex tuvo una perbona selmana al dexar les perdes y piesllar esti vienres con una xuba selmanal del 1,47%. Otramiente, l´euru sigue con fuercia nos mercaos de divises, cotizándose a 1,155 dólares. La selmana tuvo muncha volatilidá nes bolses, colos inversores del Vieyu Continente esperando una baxada de tipos del Bancu Central Européu (BCE). L´Ibex pudo finar la selmana pasada en positivo asistiándose nos 6.481,50 puntos gracies en parte a les compres derivaes del vencimientu d'opciones y futuros.



Ente les estadístiques espublizaes destaquen les del crecimientu en dellos paises europeos. Los datos son permalos y son un avance del escuru panorama económicu que vien: Alemaña y Holanda yá tan en recesión económica mentantu les economíes d´Italia y Francia vese que tan febles. Por ello los inversores enfótense en que el BCE baxe los tipos d´interés, ello cuando'l datu del IPC interanual na Zona Euru foi del 2,1% frente al 2,4 de marzu colo que los riesgos inflacionistes queden más lloñe. La estadística francesa más señera foi la cayida d´inflación nel hasta'l 2% interanual. Según dellos analistes esti datu xunta los baxos tipos d´interés nos EUA la revalorización del euru afalaríen tamién la baxada de tipos na Zona Euru.



Al otru lláu del Atlánticu Wall Street cayó'l vienres pasáu pol mal datu del IPC, que baxó dos décimes más de lo que se contaba. Parez ser qu'hai un riesgu de deflación nos Estaos Xuníos que pue llevar a un baxu consumu asemeyáu al qu'anguaño tienen los xaponeses. Positivu foi el datu de confianza empresarial de la Universidá de Michigan al superar pa bien les previsiones de los analistes. Nos mercaos norteamericanos esta foi la quinta selmana consecutiva de xubes nel Nasdaq y nel índiz Standard&Poors (S&P). El vienres pasáu el Dow Jones industrial baxó un 0,39% hasta los 8.678,97 puntos, mentantu que´l tecnolóxicu Nasdaq reculó un 0,83% mangándose nos 1.538,53 puntos



N'Europa solo Madrid y Londres trancaron en positivo mentantu Francfort y París punxéronse en números encarnaos. L´aseguradora Allianz, propietaria del bancu Dresdner Bank, dio anuncia de 520 millones de perdes ente xineru y marzu. Esti ye´l cuartu cuatrimestre seguíu de perdes pa l´aseguradora, exemplu del mal momentu que ta pasando'l sector nel mundu

Nel parqué madrilanu destacaron pel lláu de les ganancies valores como Sogecable (+3,7%). Esta empresa participada pol empresariu Polanco (El País, Canal+ etc) ta convirtiéndose nel valor más rentable de la bolsa madrilana esti añu tres de la fusión de les dos plataformes dixitales: Vía Dixital y Canal Satélite. Tamién foi una bona selmana pa Inditex, que ta recuperando terrén. El Grupu Telefónica tampoco nun rindió mal, con una xuba de la matriz del 2% el vienres pasáu. BBVA, con otru +2% y SCH y Endesa con xubes penriba el 1% foron valores que tuvieron un bon pieslle. A la contra, Gamesa, la constructora de Florentino Pérez (presidente del Real Madrid) y Bancu Popular tuvieron un mal díi'l vienres, con perdes penriba el 1%. L'índiz xeneral de la Bolsa de Madrid mangóse nos 676,25 puntos con una xuba del 0,89% mentantu'l Nuevu Mercáu tuvo una cayida del 0,06 p´asitiase nos 1.693,20 puntos.

L´euru sigue col so propiu rally alcista énte un dólar atacáu de los problemes macroeconómicos de la primer potencia mundial. Selmana de muncha volatilidá nos mercaos de divises onde un euru ya val 1,155 dólares. Otramiente, el petróleu ya nun ta lloñe de los 26 dólares barril, ello cuando tamos llegando al veranu, que baxa'l consumu. Nel mercáu de renta fixo los bonos tan cayendo na Zona Euru poles espectatives de los inversores de que'l BCE baxe los tipos.