Selmana de cayíes nes Bolses

Les duldes tornen a les bolses otra vegada más emburriando les baxaes nos índices señeros. Selmana mala nos mercaos onde´l selectivu Ibex-35 tuvo un cayida del 2,4% na selmana pasada pa quedar en 6.800,40 puntos, mientres Madrid vivió la segunda selmana de baxes nun ambiente yá de vacaciones dafechu. El pieslle de selmana foi mui feble pola perda de referencies nel otru lláu del Atlánticu al trancar Wall Street pola cellebración del Díi de la Independencia de los EEXX. Baxu volume de negociu en xeneral esperando a qu'esta selmana se dea anuncia d´abondos resultaos empresariales.



Ente les poques estadístiques de la selmana destaca'l xorrecimientu históricu del desempléu nos EEXX, que ye del 6%. La economía norteamericana nun va da-yos confianza a los inversores mentantu los analistes nun vean una recuperanza sólida a curtiu plazu. Na Zona Euru rescamplen el perimportante descensu (-2,2%) de los pidíos industriales n´Alemaña, la cayida del 1,3% de la producción industrial n´España y el resultáu de 5.100 millones d´euros de balanza por cuenta corriente de Francia. Les bolses del Vieyu Continente xuntáronse a Wall Street na tendencia baxista.

Na Bolsa de Madrid trunfó otra vegada más ún de los valores más rentables del añu: Sogecable. L´ampliación de capital d'esta empresa emburrió una xuba del 3,4% del valor el vienres, y ye que la fusión con Vía Digital ta beneficiándolaenforma. Mapfre cola so incorporación el martes pasáu al selectivu Ibex-35 tuvo una xuba del 3,6%, y tamién Acerinox y Arcelor xubieron un 2,5% y n 1,3% respectivamente pola bon momentu d´estos sectores cíclicos. Nel lláu de les perdes destaca ACS, que dio anuncia de les condiciones y plazos de la fusión con Dragados. La primer constructora tuvo una cayida del 1%, mientres que la eléctrica Endesa tampoco nun tuvo un bon pieslle por culpa de la perda de confianza por parte de dalgún analista señeru. El Grupu Telefónica tampoco nun tuvo una bona selmana, destacando la recoyida de beneficios de los inversores de la filial TPI, que ye ún de los valores más rentables del añu con una ganancia de cerca al 40%. BBVA y SCH tuvieron una selmana tranquila ensin grandes cambeos. El pieslle del vienres pasáu nel parqué madrilanu tuvo una probetaya xuba del Ibex del 0,08%.

Nel mercáu del oru prieto les tensiones en Nixeria dexaron que baxare'l preciu del Barril Brent pa manganse nos 27,75, un 1,6% menos. El país africanu pasa per una importante fuelga qu'afecta al sector col riesgu de la paralización de les esportaciones de crudo. L´euru tuvo una cayida del 0,2% p´asistiase nos 1,1418 dólares. Mentantu la renta fixa sigue ensin presta-y a los inversores nuna selmana de pequeñes baxaes y probetayes xubes de la deuda pública de dellos países europeos. Esta selmana puede marcar un puntu d´inflesión énte l´analis de dellos datos estadísticos de calter macroeconómicu y empresarial. Agora ye cuando vamos ver el pulsu de les empreses y la economía nel primer semestre d´esti 2003.