Seis nominaos al premiu al meyor cantar n'asturianu

La llista previa de nominaos al premiu al meyor cantar n'asturianu de la Sociedá Xeneral d'Autores y Editores d'España (SGAE), que se convoca por segundu añu, yá ta preparada. Seis cantares propuestos polos socios y collaboradores de SGAE concurren a esta llista preliminar de la qu'han salir los finalistes que van tener que votar los socios asturianos de la entidá.

La llista ígüenla cantares representativos de tolos estilos nos qu'esti añu s'asoleyó música na llingua del país. El folk ye'l mayoritariu, casu de "Deua Dubra" qu'apaecen nominaos col tema "Lin" o "Tarañu" que tan na llista col cantar "nun nos dexen". Más allegaos al folk-rock apaecen unos clásicos, como son yá "Skanda" que postulen al premiu pol cantar "Sangre d'ochobre" enxertu nel so últimu discu, al que-y da'l títulu. Yá nel rock dafechu alcontramos a "La Tarrancha" col cantar "presente indicativu del verbu nun trabayar", trabayu enxertu nel discu compilatoriu "Rock n'llingua" qu'asoleyó esti añu l'Aguañaz y nel que tamién veníen con composiciones orixinales una bona riestra de grupos que quedaron fuera de la llista, casu de Güerku, Skontra o Falkatrúa.

Chus Pedro, ún de los representantes más veteranos del "nuevu canciu astur" y referencia viva de la música n'asturianu de los trenta años últimos, podría ver un guapu reconocimientu a tola so carrera con esti premiu al meyor cantar n'asturianu del añu, pal que ta nomináu en primer instancia con "Agora sal a bailar" tema tradicional enxertu nel so primer discu en solitario "de ñublu y orpín" con igües del teclista Gabino Antuña.

La polémica pue volver cola presencia ente los seis nominaos del ganador del añu pasáu, Pepín Robles. L'autor de "nunca mais" cantar que ganó va agora un añu xenerando un gran espolín ente la comunidá musical asturiana, qu'entendió mayoritariamente que la obra de Robles nun yera representativa de lo que se facía nesti país, escribió pal intérprete Vicente Díaz, un clásicu de les romeríes de prau d'Asturies, el tema "La Pola de Siero" col que pieslla la llista de nominaos.

Esta llista previa, que pue consultase na web de los Premios de la Música, ta agora espuesta a suxerencies y igua de fallos hasta'l próximu miércoles 15, cuando va entamar el procesu pa decidir a los finalistes. D'otra manera, Asturies.com va entamar en pocos díes la segunda edición del so premiu particular al meyor cantar asturianu del añu entelos sos llectores. Como n'anterior edición, va haber regalos pa los participantes