Segundu trunfu pa Santi Pérez na Vuelta a España

Santi Pérez ganó ayeri la decimoquinta etapa de la Vuelta Ciclista a España, faciendo suañar a l'afición asturiana col trunfu final na prestixosa carrera. El corredor asturianu del equipu Phonak, qu'el sábadu franciere una cigua de dos años marcada pola desgracia personal y pol nun ser a rescamplar nel pelotón ganando na meta de Granada, repitió trunfu ayeri na xuba cronometrada a Sierra Nevada.

Santi cubrió los 29,2 kilómetros en solitario nun tiempu de 1 hora 2 minutos y 29 segundos, certificando un trunfu col que'l ciclista de Grau pónse amás treceru na clasificación xeneral de la ronda española.

Santi Pérez foi'l más rápidu nes durísimes ramples de Sierra Nevada, nes que fallaron los grandes favoritos como'l líder Roberto Heras, que perdió cerca de dos minutos col asturianu na etapa d'ayeri. Roberto Valverde, l'otru gran favoritu y segundu na xeneral, cedió 1,07 col de Grau, que demostró que ye l'escalador más fuerte de la carrera. Otros favoritos como Paco Mancebo o Isidro Nozal cedieron entovía más tiempu y agora yá tan per detrás de Pérez, que lleva tola selmana meyora en cada etapa y demostrando una estupenda capacidá de recuperación.

Dempués de lo d'ayeri, la selmana final de la Vuelta preséntase emocionante. Los ocho primeros de la clasificación tan nun marxe de 4 minutos y 40 segundos, y entovía queden per delantre etapes como la del Altu de la Covatilla y una cronometrada de 28 kilómetrosen Madrid, colo que la carrera pue movese enforma. De momentu Santi Pérez, el gran tapáu que salía como tercer cabeza del Phonak de Tyler Hamilton y Óscar Sevilla yá tien puesta en firme la so candidatura a ganar la Vuelta.