Segunda victoria del Acesol na Lliga

L´Acesol Voley La Calzada llogró la so segunda victoria de la temporada al ganar al C. V. Sant Cugat pol resultáu de 3-1. Nel partíu celebráu escontra esti equipu en Cataluña tamién ganare l´equipu xixonés. Con esti trunfu, el conxuntu que dirixe Roberto Frugoni salva'l primer match-ball de permanencia na Superlliga, anque la situación ta percomplicada, en cuantes que namás falten seis xornaes pa finar el campeonatu y l'equipu asturianu tien una desventaya de trés victories col primer equipu que nun desciende, que ye'l Ciudad de Las Palmas.

L´alcuentru entamó con parcial favoratible al C. V. Sant Cugat de 1-5, hasta que cuatro aiciones siguíes del Acesol empataron el partíu a 8. El momentu decisivu prodúxose cuando'l conxuntu fabril fízo un parcial de 4-0, pasando del empate a 12 al 16-12, gracies a la efectividá nel remate de Vita Prychepa. Anque'l cuadru catalán nun se dio y llogró averase nel lletrónicu con un 18-17, perdió 'l set por 25-19 con un parcial caberu de 7-2, gracies a la eficacia n'ataque de Marija Zoric, sofitada por Daniela da Silva.

El segundu set emprimó col puxu del cuadru local, gracies al poder nel ataque de Vita Prychepa, algamando un parcial de 4-0 favoratible a les xixoneses, que dexaba la diferencia en 9-4. Con 14-9, trés puntos siguíos del conxuntu entrenáu por Marc Llinás y na que la xugadora brasileña Jaline Prado de Oliveira foi la referencia n'ataque, punxeron un resultáu de 14-12. Roberto Furgoni pidió entós un tiempu muertu, pero nun tuvo'l resutáu que se contaba y el conxuntu local entró nun bache de xuegu, qu'aprovechó'l C. V. Sant Cugat pa igualar el marcador a 16 y ponese per delantre con un 16-20. Asina'l set foi pa les catalanes pol resultáu de 18-25, destacando les aiciones n´ataque d´Oliveira.

L´entamu del tercer set vieno marcáu pol aciertu n´ataque de Janesca Scharnovski, con un resultáu parcial de 5-2, xuniéndose a ello una curtia reacción del equipu foriatu col puxu de Oliveira y Marcela Ré, qu'empataron el marcador en dos ocasiones a 14 y a 15. Un estraordinariu parcial de 5-0 fizo despegar al equipu local, pasando d´un 15-15 a un 20-15, llográu en parte polos erros nel remate del equipu foriatu. L´Acesol alministro bien esa diferencia p´axudicase`l set pol resultáu de 25-22.

El cuartu set foi mui igualáu con pequeñes diferencies nel llectrónicu pa caún de los equipos, anque foi'l conxuntu catalán el que llevó la iniciativa nel mesmu. Con 20-20, l'Acesol fizo un parcial de 3-0 que diba ser definitivu pa imponese nesti últimu set por 25-23.

Nel planu individual, destacar l´escelente partíu de Vita Prychepa n'ataque, bloquéu y saque. Xunta la central ucraniana tamién rescamplaron por parte local Daniela da Silva, Marija Zoric y Janesca Scharnovski. Pol C.V. Sant Cugat destacar a la pareya formada pola brasileña Oliveira y l´arxentina Marcela Ré.

Alliniaciones:

Acesol Voley La Calzada : Maryeling Araujo; Vita Prychepa; Barbara Rodríguez; Marija Zoric ; Janesca Scharnovski y Daniela da Silva - equipu inicial - Noelia Sánchez (llíberu); Noelia Franco y Estafania Sangiao.

C.V. Sant Cugat : Dominko; Oliveira; carolina Rodríguez, Marcela Ré; Sara Rollman; Iossifova - equipu inicial - María Bonafont (llíberu) y Mariona Pauls