Segunda edición del concursu de narrativa n'asturianu de Llangréu

El Conceyu de Llangréu convoca la segunda edición del so Concursu de Narrativa n'asturianu, nel que l'añu pasáu ganó Pablo Rodríguez Medina cola obra "Los Taraos".

La organización pon, xunta'l premiu en metálicu, el compromisu d'espublizar la obra ganadora

Les bases del concursu manden que les obres, escrites n'asturianu, han tener una estensión mínima de 50 fueyes a doble espaciu con temática llibre, pudiendo mandase per corréu o entregase na Casa la Cultura de Sama (Escueles Dorado), c/ Dorado, 6 Planta 2ª 33900, dende xunetu hasta l'últimu día d'ochobre,alcordándose tamién d'enxertar nel paquete otru sobre zarráu colos datos del autor.

El primer premiu a la obra ganadora tien 600 € en metálico y l'espublizamientu de la mesma, acutando'l conceyu con 25 exemplares pal autor. D'otra manera, el xuráu pue poner accesits de 300 y 150 euros si-y abulta que les obres presentaes tienen calidá abonda. Pa cualquier aclaración, el teléfonu de la Casa la Cultura ye'l 985 67 8158