Sastre pide’l llevantamientu del secretu de sumariu de la trama

El conseyeru d'Educación, Herminio Sastre, destacó esti llunes la importancia de que se llevante'l secretu de Sumariu nel casu Riopedre, pa poder dar les esplicaciones oportunes.

Sastre, quien foi al actu d'inauguración de la Selmana Cultural del Colexu San Eutiquio-La Salle, destacó, en respuesta a los periodistes, qu'hai funcionarios que trabayaron col ex conseyeru d'Educación, José Luis Iglesias Riopedre, y la directora de Planificación de Centros, María Jesús Otero, en prisión provisional pol casu Renedo', y que nun dan creitu a esta situación, yá que los conocieron precisamente al traviés del trabayu.
  
Coles mesmes, dexó claro que'l Gobiernu asturianu va collaborar cola Xusticia na clarificación y entrega de documentos que sían precisos. Pa él, lo meyor ye conocer qué ye lo qu'hai de verdá y añadió qu'hasta agora naide puede opinar nin dicir nada al tar el Sumariu baxu secretu.

Afectará daqué
Tamién reconocío qu’esti casu afectará daqué a la Conseyería d'Educación, pero aseguró qu'ésta siguirá trabayando y funcionando con toa normalidá y sorrayó que se sigue cumpliendo la Llei de contratos.