Sarkozy va reformar les pensiones pesie a la fuelga xeneral

El presidente francés, Nicolas Sarkozy, aseguró un día dempués de la última xornada de fuelga xeneral nel país galu contra la reforma del sistema de pensiones, que va aumentar la edá mínima de xubilación de los 60 a los 62 años.

Argumentó que la reforma ye "un deber", polo que considera "indispensable" llevar el proyectu de llei "hasta'l final", según informó a los medios franceses la secretaria d'Estáu de Familia, Nadine Morano.
  
Coles mesmes, nun almuerzu con dellos diputaos, Sarkozy calcó en que nun pue "dir más lloñe" coles concesiones y reconoció que ye normal qu'esta reforma provoque descontentu y frustración. Sicasí, aseguró que dientro d'unos años va apreciase qu'esti proyectu salvó'l sistema de pensiones y afirmó que nun hai otra forma de financiala que retrasando la edá de xubilación.
  
Nesta llinia, el voceru del Gobiernu, Luc Chatel, insistió tres el Conseyu de Ministros en que l'Executivu galu tien que siguir alantre "con determín y sangre frío" cola reforma, dao que ye'l so deber preparar el futuru y facer prevalecer en toles circunstancies l'interés xeneral".
  
Manifestaciones masives
Les manifestaciones convocaes esti martes en Francia mientres la xornada de güelga contaron con más asistentes que les marches entamaes nel paru anterior, anque les cifres varien ente los 3,5 millones d'asistentes anunciaos polos sindicatos y los 1,2 millones confirmaos pol Ministeriu del Interior.
  
Dellos sectores como los tresportes y el rellacionáu col petróleu celebraben esti miércoles una nueva xornada de fuelga, coles mesmes que los sindicatos del sector ferroviariu apoyaben n'asamblea siguir alantre col paru llaboral.
  
Respecto al siguimientu de la convocatoria del miércoles, la compañía estatal de ferrocarriles de Francia SNCF estimaba que'l 24,6% de la plantiya secundara la tercer xornada de fuelga, frente al 40,4% del martes. Pela so parte, la rede de tresporte urbanu de París RATP, cifraba'l siguimientu nel 8%, frente al 17% d'ayeri.
  
Nel sector del petróleu, el grupu Total anunció que la fuelga contra la reforma de les pensiones provocó'l paru de seis refineríes en Francia, mientres que, na ciudá de Marsella, el bloquéu de les terminales petroleres calteníase per decimoséptimu día siguíu.