Santu Adrianu 2003

Otru añu más el mercáu de Santu Adrianu ufiértanos trés díes de cultura asturiana nos que la música tien
muncha importancia y presencia.



El Mercáu de Santu Adrianu xunta nesti pequeñu conceyu del
centru d'Asturies artesanía, música, gastronomía, y deporte
tradicional, iguando una prestosa ufierta que nun se pue dexar pasar. El
Mercáu entama'l xueves día 17 d'abril, colos puestos habituales
d'artesanos, comida y luthiers, dexando pa les 20:00 hores la yá
conocía nueche de los "Virtuosos", un conciertu qu'axunta enriba del mesmu escenariu a músicos de distintos grupos y conxuntos pa dar un mesmu conciertu. Les estrelles convidaes d'esti añu van ser el gaiteru Santi Caleya y la zanfonista Merce Santos, dambos componentes de
"La
Bandina", xunta Pepín de
Muñalén a la xiblata y Marga Lorences col curdión, miembros los dos de
"La Bandina'l Tombo". El conxuntu complétase cola presencia del bandurrieru Héctor Braga.



El vienres pela nueche va haber una iniciativa que xira alredor del
baille asturianu. Llámase la "Nueche les dances", y quier
convertíse nun espaciu pa que tola xente, lo mesmo que sepia baillar como que non
pueda disfrutar col baille tradicional. Pa ello va contase cola presencia de
dellos músicos fechos a tocar pal baille, asina como persones
qu'ayudarán a tol mundu a participar de l'actividá.



El sábadu llega la "Xuntanza", siendo la nueche folk el
tueru d'esti día. Esti añu va cambiar el llugar habitual onde se
fai'l conciertu y l'acampada. Mientres que otros años venía
usándose l'área de "La Buyera", esti añu múdase pa
"Tuñón", anque esti prau sigue tando bien cerca de
Villanueva de Santu Adrianu, capital del conceyu y centru del Mercáu. El
conciertu va entamar a les 22:00 con "Milio'l del Nido" colos sos
cuentos y histories, entamando tres d'elli la música con Anabél
Santiago, que prácticamente presenta'l directu del so discu
"Al
son de la lluna" esta nueche. Darréu van venir unos
clásicos del rock asturianu "Los Berrones", pa siguir
depués con "N'Arba" y los que nunca nun pueden faltar en Santu
Adrianu: "Dixebra".