Santi Vila sal de la cárcel tres pagar la fianza

L'ex conseyeru catalán d'Empresa i Coneixement pasó la nueche en prisión, al igual que los otros ocho miembros del Govern que declararon na Audiencia Nacional.

Santi Vila, que dimitió hores enantes de la votación de la independencia nel Parlament, yera l'únicu d'ellos a los que la xueza Carmen Lamela dio la posibilidá d'evitar la cárcer baxo pagu d'una fianza de 50.000 euros por considerar que nun esiste riesgu de reiteración delictiva. Sicasí, pasó la nueche en prisión en solidaridá colos sos compañeros.

La Fiscalía solicitara ayeri cárcel ensin fianza pa los otros ocho miembros del cesáu Gobiernu de Catalunya, pola aplicación del artículu 155 de la Constitución, y depués de que declararen na Audiencia Nacional, Lamela dictó la entrada en prisión de toos ellos. Mentes, la xueza ta preparando una orde internacional de busca y captura del ex presidente Carles Puigdemont y los otros cuatro conseyeros que permanecen con él en Bruxeles.

Los líderes d'ANC y Òmnium van siguir en prisión

L'Audiencia Nacional refugó'l pidimientu de los abogaos de Jordi Sánchez, presidente de l'Asamblea Nacional Catalana (ANC), y Jordi Cuixart, presidente d'Òmnium Cultural, pa que pudieren salir de la cárcel al entender que nun hai riesgu de reiteración delictiva al cambiar la situación política en Catalunya tres l'aplicación del artículu 155. Dambos, acusaos por sedición, permanecen presos dende'l 16 d'ochobre.