Santi Pérez yá ta segundu na Vuelta a España

Venticinco años dempués de los grandes llogros de López Carril o del desapaecíu José Manuel Fuente "El Tarangu" un ciclista asturianu vuelve a lo más alto de la Vuelta Ciclista a España.

Na etapa d'ayeri en La Covatilla, el moscón Santi Pérez púnxose segundu na clasificación xeneral y demostró otra vegada que ye'l más fuerte en cuantes el recorríu se pon cuestu, arrampuñándo-y na meta de La Covatilla 32 segundos de diferencia al líder de la xeneral, Roberto Heras, que nun pudo aguantar l'andar del asturianu, del que se descolgó a dos kilómetros de la meta.

Foi la d'ayeri una etapa emocionante, con un ascensu final al altu de La Covatilla nel que la carretera dictó otra vegada la sentencia d'una carrera que se xuega por eliminación y na que, nel so particular xuegu de les sielles, ayeri quedó ensin banqueta Alejandro Valverde.

Cuando Heras y Santi Pérez tensaron la cuerda, el corredor del Kelme, que diba segundu na xeneral, diose y perdió en meta 2 minutos 41 segundos respective a Santi Pérez, que-y quitaba asina la segunda plaza na xeneral.

Con too y con ello, la cosa tuvo dalgo más d'historia. El colombianu Félix Cárdenas ganó la etapa rematando una escapada llarga que supo alministrar correctamente, pero tres d'elli veníen los dos favoritos, Santi Pérez y Roberto Heras, que descolgaren a tolos demás corredores dempués d'un gran llabor de desgaste del conxuntu d'Heras, que corría en casa.

Posiblemente'l nun querer da-y un disgustu a la xente d'Heras o la falta d'enfotu llevaron a Santi a aguantar la rueda del de Béjar durante más tiempu de lo necesario. L'asturianu esplicó dempués qu'elli y Heras aspautaron relevase pa cazar a Cárdenas y ganar la etapa, pero a doskilómetros del cume Santi Pérez decatose de que nun yera un tratu que lu beneficiare, abandonando al xarsé mariellu de la vuelta y llantándose en meta con 32 segundos que saben a poco dempués de ver la facilidá con que lu dxó atrás y lo cansu que llegó a la meta'l doble ganador de la Vuelta.

Agora, Santi Pérez ta a 1,15 d'Heras y ye l'únicu ciclista que-y pue quitar al corredor del Liberty Seguros el so tercer trunfuu na gran ronda. Quéden-y pa ello una etapa con cuatro altos de primera incluyendo Navacerrada y una cronometrada peles cais de Madrid.