Santi Pérez prende la Vuelta

El ciclista asturianu Santi Pérez apretó les diferiencies na Vuelta a España na etapa d'ayeri, onde-y quitó otros trenta segundos al líder Roberto Heras. La diferiencia ente los dos favoritos pal trunfu final güei en Madrid ye de 43 segundos al favor del corredor del Liberty Seguros. L'asturianu del Phonak tien 29 kilómetros p'arrampuñar esa diferiencia, y anque nun parte como favoritu, ye l'únicu que-y pue quitar a Heras la so tercer Vuelta a España.



Santi Pérez fizo lo que s'esperaba d'elli y, dempués d'una etapa mui dura na que los favoritos foron descolgándose adulces del grupu de cabeza hasta quedar solos Pérez y Heras, entamó nos kilómetros finales del ascensu a Navacerrada, un acosu constante al líder. Heras respondió a los primeros intentos del asturianu por dexalu atrás, pero dióse a dos kilómetros del cume, entamando'l de Grau un ataque espectacular faciendo col platu grande los dos últimos kilómetros pa quitá-y a Heras 30 segundos na llinia de meta, na qu'entrare en primer llugar Quique Gutiérrez, compañeru d'equipu del asturianu.