Santi Pérez, a trenta segundos de ganar la Vuelta

El ciclista asturianu Santi Pérez ganó la cronometrada en Madrid cola que remataba la Vuelta a España, pero nun-y sacó a Roberto Heras los 43 segundos que precisaba pa ganar la carrera

Santi Pérez fizo na Vuelta a España 2004 un segundu puestu que val tanto como si ganare la carrera. Acabando a trenta segundos de Roberto Heras na xeneral, l'asturianu, col que nadie nun contaba pa los primeros puestos, ye la nueva gran esperanza del ciclismu español y marcha pa casa con tres etapes, el segundu puestu na xeneral y un carráu d'ufiertes d'equipos pa correr l'añu qu'entra y que yá ta analizando'l manager del corredor, Tony Rominger.

D'otra manera la etapa d'ayeri nun tuvo muncha historia. Heras, que xugaba cola baza de ser el veteranu y de tar fechu yá a correr baxo presión, reguló bien la fuerza que-y quedaba pa nun descolgase del asturianu, que salió a intentar una misión bien difícil, quitá-y al de Bejar 43 segundos en namás 28 kilómetros, ello dempués de llevar toa una temporada nes piernes. Santi nun defraudó y allegóse más a Heras, pero'l corredor del Liberty, cola ventaya de salir per detrás del asturianu y conocer asina toles sos referencies de pasos kilométricos, axustó pa perder menos d'un segundu per kilómetru y entrando en meta a 13 de Santi Pérez, que tuvo'l consuelu de ganar la última etapa d'una vuelta devaluada pola falta de participación estranxera.