Santander acoyó la I Conferencia de los Gobiernos de Comunidaes Autónomes

|

El Palacio de la Magdalena de Santander acoyó esti llunes la I Conferencia de los Gobiernos de Comunidaes Autónomes. María José Ramos, conseyera de Presidencia, Xusticia y Igualdá, foi la representante del Gobiernu asturianu.
 
Asturies incorpórase, d’esta forma, a esta ainiciativa que ye una continuación de los alcuentros ente comunidaes autónomes celebraos dende’l 2008 pal desarrollu de los estatutos d’autonomía. “La finalidá d’esti foru, que naz con vocación de continuidá y permanencia, ye promover la cooperación y la collaboración tanto política como alministrativa ente’l conxuntu de les comunidaes autónomes”, señalen dende Presidencia. Hai que señalar que nesta conferencia participaron toles comunidaes, a escepción d’Euskadi.
 
Nel aconceyamientu d’esta mañana en Santander, que tuvo presidíu pol presidente cántabru, Miguel Ángel Revilla, “analizóse’l grau de desarrollu del Estáu de les Autonomíes y la meyora de los procedimientos de cooperación ente comunidaes autónomes. Les conclusiones, tal y como quedaron reflexaes na Declaración final, incluyeron l’apoyu unánime al Estáu autonómicu, y resaltaron el papel coprotagonista de les comunidaes, xunto al Estáu, nel desarrollu económico y social d’España asina como la defensa de la so validez como instrumentu de futuru”, apuntaron dende’l departamentu de Ramos, que tuvo acompañada del direutor de la Oficina de Relaciones cola Xunta Xeneral, Gonzalo Olmos Fernández-Corugedo.
 
De los alcuerdos roblaos nesta xornada, Asturies sumóse al “Protocolu Xeneral pa la definición d’estratexes comunes orientaes a impulsar actuaciones conxuntas en materia d’industria y seguridá industrial; el Protocolu Xeneral pa la definición d’estratexes comunes orientaes a impulsar actuaciones conxuntes en materia de I+D+i; el conveniu de collaboración pal intercambiu d’información sobre la identidá de les persones inscrites nos rexistros de pareyes de fechu o naturaleza similar; el Protocolu Xeneral pa la definición d’una propuesta común de les comunidaes autónomes ante la reforma de la política común de pesca; y el conveniu de collaboración pal impulsu d’actuaciones conxuntes pa meyorar la ufierta de tresporte públicu al traviés de la incorporación de sistemes teunolóxicos.

Contador Estadistiques