Santa María de Bendones presenta cubierta nueva

|
Berta Piñán visita remocicamientu Santa María de Bendones

“Ye una gran tresformación”, celebró Berta Piñán, conseyera de Cultura, Política Llingüística y Turismu, nuna visita “a esta pequeña xoya del prerrománicu asturiana” al finar los trabayos de remocicamientu de la ilesia. La intervención llevó a la rehabilitación completa de la cubierta, intervenida anteriormente na década de los 80 del sieglu pasáu.

Acompañada por Pablo Léon, direutor xeneral de Cultura y Patrimoniu; del conceyal delegáu de Distritos y Edificios y Patrimoniu, Luis Pacho, y el de Víes Urbanes y Rurales y Allumáu Urbanu y Rural, Alfonso Pereira; y de representantes del Arzobispáu y de la empresa encargada de les obres desplazóse hasta esta población uvieína pa conocer el resultáu final de la rehabilitación. Ésti, con una inversión de 144.152 euros, consistió nel llevantamientu y reorganización completa del teyáu, procurando l’aprovechamientu máximu de los materiales esistentes, pa finar asina colos problemes de filtraciones nel interior del templu.

Amás instalóse una rede perimetral de drenaxe p’amenorgar les humedaes por capilaridá que sufren les muries, asina como la renovación de los paramentos afeutados que se separaren y l’axuste de les carpinteríes que taben fuera de serviciu. La intervención tamién llegó a la torre campanariu, un elementu singular nes que se fixeron obres pa torgar les filtraciones y nel que se sustituyó un falsu cargaderu de madera afuetáu pola humedá nún de los güecos.

Piñán rescampló que “ye una gran tresformación. De venir a ver la ilesia enantes, a esta pequeña xoya del prerrománicu asturianu, a vela agora ye una sopresa, que va recibir tou visitante, toa persona que s’acerque”. La conseyera tamién apuntó que, amás de la propia rehabilitación, too “llimpióse de manera que la primer impresión cuando llegues ye dalgo que tol mundu va notar”, convidando a tolos uvieínos y asturianos a visitar “esta nueva versión, tan remocicada y maraviyosa de la ilesia”.

Otres actuaciones

Tamién apuntó’l llabor constante de conservación y rehabilitación que l’Executivu fai col Arzobispáu “pa velar por que la xoya indiscutible que representa’l prerrománicu se caltenga nun estáu de conservación óptimu, tanto los propios monumentos como’l so entornu, pa facelos más accesibles y garantizar la so proteición”. Nesi sen, recordó que los Presupuestos del 2023 dediquen mediu millón d’euros p’afrontar intervenciones na cripta de Santa Leocadia na catedral, en Santa María del Naranco, en San Pedro de Nora y en La Foncalada, y el proyeuto de sienda peatonal pa coneutar Santa María del Naranco y San Miguel de Lliño n’El Monte Naranco, amás d’una inversión de 300.000 euros pa la renovación del área dedicáu a esti arte que’l Muséu Arqueolóxicu d’Asturies exhibe na so coleición permanente.

Contador Estadistiques