Sanjurjo diz que Pardo nun sabe de la llingua porque nació en Madrid

La llingua ye motivu de polémica ente les fuerces mayoritaries en conceyu de Xixón. L'otru día la líder del PP local, Pilar Fernández Pardo, adelantaba que nel so partíu había un debate encesu sobre la cuestión de la llingua y declarabaque laso posición siempre diba tar un pasu per delantre que ladel PSOE, que taba asitiáu nel inmovilismu llingüísticu. L'alcalde en funciones del Conceyu de Xixón, Pedro Sanjurjo, retrucó a esta acusación en declaraciones que reproduxeron los periódicos de Xixón Sanjurjo intentó facer de menos les crítiques de la conceyala popular, llamando l'atención sobre la "sensibilidá" qu'esiste sobre lacustión llingüística nel so partíu. Sanjurjo, que tamién declaró que la llingua asturiana nun presenta un mínimu d'unidá "coexistiendo delles variedaes de fala nel conxuntu de la rexón" echó tamién pela persona de Pilar Fernández Pardo (Madrid 1959) calificándola de nun ser la persona más afayadiza pa falar de temes de llingua, sobre los que podía tener "una gran sensibilidá pero tamién un gran desconocimientu en cuantes qu'ella nun ye asturiana".


Les pallabres de Sanjurjo repercutieron na redolada del PP, más concretamente nel Círculu de Pensamientu Lliberal, qu'emitió un durísimu comunicáu en que diz que'l trubiecu de los ancestros de caún nun val pa calificar o descalificar como lo fizo l'alcalde en funciones. Pal Círculu, la rempuesta del señor Sanjurjo a les declaraciones de la senadora Pilar Fernández Pardo "amuesa'l pensar xenófobu qu'añera nel subconsciente del conceyal socialista" y amiesta que "ye tristayo que n'Asturies, en sieglu XXI, dalgún políticu fale d'esa miente, lo que n'otres llatitúes llevaría darréu a la dimisión del autor d'esti comentariu propiu d'individuos autoritarios y enemigos de la democracia".

El Círculu de Pensamientu Lliberal atalanta que tres d'esta "salida tiestu" de Sanjurjo escuéndese la rialidá de que la FSA nun fai un res pol futuru de la identidá llingüística d'Asturies y que'l so facer nesta cuestión ye'l de torgar no posible tou avance. El Círculu de Pensamientu Lliberal, que diz que ensin ponese a esbillar nos llugares de nacencia de nadie, ye necesario "remembrar los munchos incumplimientos de los socialistes na materia que nos ocupa" como'l fechu de que'lPSOE votare nel so día a la escontra de la Llei de Normalización del Asturianu, qu'aprebare'l PP en collaboración col diputáu del Partíu Asturianista

El Círculu de Pensamientu Lliberal conclúi esperando "que'l señor Sanjurjo curie meyor la calidá democrática de les sos espresiones" y qu'estes nun deriven, nin nelli nin nel so partíu, tan amigu de reconocer drechos civiles n'otros sitios, n'argumentaciones fascistes" no tocante a Asturies.