Sánchez fai una remodelación amplia del Gobiernu, con 7 cambios

Rescampla la salida de Carmen Calvo y José Luis Ábalos del Conseyu de Ministros.

Pedro Sánchez anunció'l sábadu una de les mayores remodelaciones en Democracia del Gobiernu en plena llexislatura. El socialista fai siete cambios, que nun afeuten a los cargos de Xuníes Podemos, dando un mayor pesu femenín al Executivu y apostando por un perfil más mozu procedente del municipalismu.

La vicepresidenta Calvo dexa la so cartera, Presidencia y Rellaciones coles Cortes y Memoria Democrática, que va garrar el madrilanu Félix Bolaños. El cambiu fai que se pase de cuatro a trés vicepresidencies, ocupando la primera Nadia María Calviño; la segunda, Yolanda Díaz Pérez; y la tercera, Teresa Ribera.

Ábalos, secretariu d'Organización del PSOE, abandona Tresportes, Movilidá y Axenda Urbana, que va pa la catalana Raquel Sánchez Jiménez; Arancha González-Laya, Asuntos Esteriores, Xunión Europea y Cooperación d'España, siendo sustituyíu pol madrilanu José Manuel Albares; Juan Carlos Campo, Xusticia, que garra la madrilana con raigaños en Villaviciosa, Pilar Llop; Isabel Celáa, Educación y Formación Profesional, cartera que recueye l'aragonesa Pilar Alegría; y Pedro Francisco Duque, Ciencia y Innovación, releváu pola valenciana Diana Morant. Mentes, Miquel Octavi Iceta dexa Política Territorial y Función Pública pa tomar Cultura y Deporte en sustitución de José Manuel Rodríguez Uribes, pasando Política Territorial pa la manchega Isabel Rodríguez García, que Sáncez noma vocera del Executivu, y Función Pública pa María Jesús Montero, que caltién Facienda y dexa la portavocía.

Les ministres y ministros nuevos, y les trés vicepresidentes, tomaron posesión de los sos cargos énte'l rei Felipe VI esta mañana nel salón d'audiencies del Palacio de la Zarzuela. Otra manera, Sánchez coloca al frente del Gabinete de Presidencia al madrilanu Óscar López Águeda en sustitución d'Iván Redondo.