Sánchez decreta l’estáu d’alarma en tol Estáu pol andanciu de coronavirus

El Conseyu de Ministros estraordinariu convocáu pol Gobiernu pal sábadu va decretar l’estáu d’alarma en toda España p’aplicar asina “decisiones esceicionales” que van tar orientaes “a movilizar tolos recursos del Estáu pa protexer meyor la salú de tolos ciudadanos”, apuntó’l presidente Pedro Sánchez nuna declaración institucional. Ente elles podía tar la restricción de la movilidá de les persones.

Con 4.209 casos confirmaos de COVID-19, enfermedá causada pol coronavirus SARS-CoV-2 , en toda España a les 13 hores, 68 n’Asturies, Sánchez anunció al rodiu les 15.30 hores la so decisión de decretar l’estáu d’alarma per 15 díes. D’esta manera’l Gobiernu va poder decretar midíes esceicionales, como llendar la llibre circulación de persones o retrasar la celebración de les eleiciones vasques y gallegues, convocaes pal 5 d’abril.

Esti pasu llega depués de qu’ayeri quedara descartáu pol Conseyu de Ministros. L’aumentu continuu de casos, que podríen llegar a los 10.000 la selmana qu’entra según apuntó’l propiu presidente, les presiones y la posición de Portugal, que la declarara esta mañana hores enantes con namái 78 casos, provocaron esti cambiu de posición.

Un únicu precedente

Nel pasáu namái s’activara l’estáu d’alarma nel Estáu en Democracia nuna ocasión. Foi nel 2010, col socialista Zapatero nel Gobiernu, con motivu de la fuelga de controladores aéreos, pa militarizar les torres de control y garantizar el tráficu.