Sánchez conforma un “Conseyu de Ministres y Ministros”

|
Sánchez conforma un “Conseyu de Ministres y Ministros”

Pedro Sánchez arrodióse d’una mayoría femenina y feminista pa la conformación del Gobiernu nuevu del Estáu. El socialista amplía de 13 a 17 les carteres, de les que 11 van tar dirixíes por muyeres, polo que la fórmula “Conseyu de Ministres y Ministros” foi la más emplegada na toma de posesión celebrada na Zarzuela.

Anque dellos nomes yá s’avanzaron nos díes últimos, hasta la tarde d’ayeri nun se conoció’l llistáu definitivu de les persones que van acompañar a Sánchez nesta etapa qu’entovía nun tien fecha de caducidá, anque la idea amosada mientres la moción de censura yera la de nun agotar la llexislatura. El líder del PSOE apostó por un equipu con mayoría de muyeres, toes con un marcáu calter feminista, nuna situación nunca dada en Democracia.

La númberu 2 de Sánchez va ser Carmen Calvo, qu’amás de la vicepresidencia única va llevar el recuperáu Ministeriu d’Igualdá. Xunta a ella, diez muyeres y seis homes que van encargase de les carteres siguientes:

  • Xusticia: Dolores Delgado.
  • Asuntos Esteriores, de Xunión Europea y de Cooperación: Josep Borrell.
  • Defensa: Margarita Robles.
  • Facienda: María Jesús Montero.
  • Interior: Fernando Grande-Marlaska.
  • Fomentu: José Luis Ábalos.
  • Educación y de Formación Profesional (amás de ministra vocera): Isabel Celaá.
  • Trabayu, Migraciones y Seguridá Social: Magdalena Valerio.
  • Industria, Comerciu y Turismu: Reyes Maroto.
  • Agricultura, Pesca y Alimentación: Luis Planas.
  • Política Territorial y Función Pública: Meritxell Batet.
  • Transición Ecolóxica, Teresa Ribera.
  • Cultura y Deporte, Màxim Huerta.
  • Economía y Empresa: Nadia Calviño.
  • Sanidá, Consumu y Bienestar Social: Carmen Montón.
  • Ciencia, Innovación y Universidaes: Pedro Duque.

Lastra, vocera nel Congresu

Tolos ministros tomaron posesión del so cargu esta mañana nel Palacio de la Zarzuela frente al rei del Reino de España, Felipe VI, baxo la fórmula de la promesa, ensín símbolos relixosos y emplegando mayoritariamente la espresión “Conseyu de Ministres y Ministros”. Ente ellos finalmente nun hai nengún asturianu pese a qu’hebo rumores de posibles, como Hugo Morán o María Luisa Carcedo.

Mentes, la tamién asturiana Adriana Lastra va ocupar el cargu de vocera del grupu socialista nel Congresu. La vicesecretaria xeneral del PSOE ye ún de los grandes apoyos de Sánchez.

Contador Estadistiques