Samuel Sánchez abandona nel Tour

Nel día de gloria pal equipu Euskaltel-Euskadi, que ganó la etapa con final n'Alpe d'Huez gracies a Iban Mayo, l'asturianu del equipu vascu, Samuel Sánchez, tuvo qu'abandonar la ronda gala por llegar fuera de control a la meta alpina. El corredor asturianu, qu'aspiraba a metese na llucha pol maillot blancu a los corredores de menos de 25, aguantó la etapa entera, de más de 230 kmts, con una gastroenteritis que nun lu dexó comer en tol día, teniendo que parar a devolver delles veces nel trescursu de la carrera. Baldáu pol esfuerzu, el corredor llegó al altu de l'Alpe d'Huez gracies a los emburriones del públicu, pero los comisarios yá lu avisaren de que llevaba más d'un cuartu d'hora de retrasu sobre l'horariu tope pa llegar a meta. El ciclista asturianu contaba con que los xueces llevantaren un poco la mano, pero la organización decretó'l fuera de control pal corredor del Euskaltel Euskadi.