Samuel Sánchez, campeón de la montaña del Tour de France

|

L’uviedín Samuel Sánchez convirtióse nel primer asturianu en ganar la clasificación de la montaña del Tour de France. El ciclista del Euskaltel-Euskadi completó asina una participación espectacular que tuvo como premiu’l trunfu en Luz-Ardiden.
 
Dende que Vicente López-Carril terminara terceru nel Tour de 1974 vistiendo’l maillot del Kas, nengún asturianu consiguiera xubir al podiu de los Campos Elíseos –enantes tamién lo fixera El Tarangu–. Nesta ocasión nun foi pola xeneral –na que Sánchez terminó sestu–, sinón pol primer puestu de la clasificación de la montaña de la ‘Grande Boucle’. Asina, l’uviedín, que raspió otru trunfu d’etapa’l vienres, nesta ocasión n’Alpe-d’Huez, al entrar segundu a 14 segundos del francés Pierre Roland (Europcar) completó una actuación magnífica nesta edición de la ronda gala. Sicasí, la etapa alpina permitió al campeón olímpicu de ciclismu en ruta algamar el maillot de puntos colloraos que viste’l llíder d’esta clasificación.
 
D’esta forma, Sánchez sucede nesti premiu tán prestixosu al francés Anthony Chartreau y graba’l so nome xunto al d’otros ciclistes ilustres como Richard Virenque, Laurent Jalabert, Bernard Hinoult, Lucho Herrera, Eddy Merckx, Federico Martín Bahamontes o’l suizu Toni Rominger, ganador de la montaña nel 1993 defendiendo’l maillot del equipu profesional asturianu Clas-Caxastur. Otra manera, el campeón final de la ronda gala foi l’australianu Cadel Evans (BMC), que tuvo acompañáu nel podiu polos hermanos Schleck (Leopard-Trek), Andy y Frank. Mentes, el corredor d’Ellan Vannin (Isla de Man), Mark Cavendish (HTC-Highroad), llevóse’l trunfu na clasificación de la regularidá; el francés Pierre Roland, la de meyor xoven; y l’equipu estauxunidense Garmin-Cervélo, la de meyor conxuntu.

Contador Estadistiques