Samartín remata la traducción al asturianu de la web municipal y recupera les noticies nesti idioma

El Conceyu de Samartín del Rei Aurelio da un reblagu na normalización de la llingua asturiana. Ta acabante de rematar la torna al asturianu de la web municipal y, al empar, retoma la espublización de noticies nesti idioma nel mesmu portal.

Con esti llabor “tratamos de normalizar, potenciar y fomentar l’usu del asturianu ente la población del conceyu”, esplicó la conceyala de Cultura, María Alonso. Anque yá finó’l procesu de traducción, ésti nun termina equí, “sinón que va continuar nel tiempu” al entender la web como un ente dinánmicu “onde se revisen, renueven ya incorporen conteníos de manera periodica”.

P’acceder al conteníu n’asturianu hai que calcar na bandera d’Asturies asitiada na parte superior de la pantalla. Tanto los conteníos de les diferentes estayes que s’organiza el portal web como’l bloque de noticies qu’aparez de manera destacada na portada van poder lleese en llingua asturiana, cola esceición del portal de tresparencia, “entá en procesu de dotación de contenios, que va entamase nuna siguiente fase”.