Samartín del Rei Aurelio vive dos folixes con sabor asturianu

El conceyu de Samartín del Rei Aurelio tien esta fin de selmana un programa cargáu de celebraciones con sabor asturianu. Per un lláu, les fiestes del Cristu la Paz, en Brañella, y, per otru, el II Mercáu Tradicional de La Cerezal-Santa Bárbara.
 
L’Asociación de Festeyos Cristu la Paz y l’Asociación Cultural Caleyando per Brañella entamen un añu más les fiestes del Cristu la Paz nesti pueblu de 4 habitantes que multiplica por mil la so población nestos díes. Esta romería centenaria, que tien tola cartelería n’asturianu, va principiar el sábadu cola VIII Ruta BTT, na que participen 150 deportistes procedentes de toda Asturies y de Madrid, Galicia, Ceuta y Cantabria, y la IX Ruta de Senderismu ‘Memorial Xuan Xosé Vega y Adrián González’, actividaes que van principiar a les 9.30 hores. Sicasí, l’aniciu oficial de la folixa va ser al meudía, col chupinazu y el toque la campana de la capiella’l pueblu. Per delantre quedarán trés xornaes cargaes d’actividaes socio-culturales de toda triba.
 
Asina, pela tarde habrá campeonatos de deportes tradicionales asturianos, como’l tiru al cencerru con gomeru y la rana, y xuegos pa neños y neñes, ente otres munches actividaes, enantes de proceder, a les 19 hores, a la llectura del pregón, qu’esti añu corre a cargu d’Armando Rodríguez Vallina. Pa zarrar esta primer xornada, va celebrase una verbena con Época, La Orquestina y l’actuación de Manolo Peñayos, que va xubir al escenariu tres Jaime Canteli. El conciertu del ex integrante de Nuberu va principiar a les 00.30 hores. Los interesaos n’acudir a la folixa y nun quieran garrar el coche, tienen a la so disposición autobuses dende L’Entregu, con salida frente a la sidrería La Llaguna.
 
El domingu, día grande de los festexos, va tener llugar, ente les 12 y les 18 hores, un ‘Alcontro del Grupu de Porteadores de la Tradición Oral San Tirso del Eo’, nel qu’esti coleutivu de Santiso d’Abres va mostrar oficios tradicionales, xuegos, histories y tradiciones del país. A la hora de la xinta, ta prevista la gran corderada –con reserva–, y, yá pela tarde, más xuegos tradicionales y los Cantares de Chigre, a cargu del Orfeón Gijonés (17 hores). La música de la verbena va correr a cargu del Grupu Tekila (19 hores).
 
La Canción Asturiana va ser la protagonista del llunes, tercer y últimu día de les fiestes, cola celebración del décimu festival de Brañella tres l’entamu del desfile de ‘La Pirula’, acompañáu por una banda de gaites, y de la xira campestre al prau de la fiesta, previstes pa les 19 hores. Asina, nel escenariu instaláu nel pueblu van actuar, a partir de les 20 hores,  Anabel Santiago, Francisco Martín Holgado, Luis Andrés Collado y la monologuista Luz del Sol. La tercer verbena va principiar a les 21 hores coles orquestes Ideas y Galaxia.
 
Otra manera, hai que destacar que’l llunes va tener llugar tamién la XI Concentración Escolar, na que la organización pon autobuses gratis a tolos escolinos y escolines del conceyu pa que puedan acudir a la fiesta. Asina, cada añu, unos 300 neños y neñes aporten a Brañella pa disfrutar d’un espectáculu infantil y una chicolatada con churros de baldre.
 
Mercáu Tradicional
 
El domingu tamién ye xornada festiva en La Cerezal-Santa Bárbara –en concreto nel entornu de los pueblos d’El Bericiusu y La Espesura–, onde ta prevista la celebración del II Mercáu Tradicional. L’Asociación Cultural y Medioambiental Los Pataqueros son los responsables d’esta iniciativa que cuenta con 34 puestos d’artesanía y alimentación, y dellos talleres artesanos.
 
El mercáu va abrir a les 10 hores, tres un pasucais con gaita y tambor a la que va siguir una misa cantada pol Coru Parroquial de Sotrondio, y va poder visitase hasta les 20 hores. A les 17 hores va celebrase una exhibición d’arqueros y tán previstes, a lo llargo de la tarde, actuaciones del monologuista Xosé Nel. “Queremos felicitar a Los Pataqueros pol so compromiso con esti mercáu que pretende dinamizar la vida sociocultural en los pueblos, recuperar les tradiciones y dar a conocer el valle de Santa Bárbara”, señaló la conceyala de Cultura, Gema Suárez, na presentación d’esta segunda edición del Mercáu Tradicional.