Samartín del Rei Aurelio va repartir 1.275 árboles autóctonos ente los neños y neñes del conceyu

Coincidiendo coles celebraciones alredor del Día Mundial del Mediu Ambiente (5 de xunu), Samartín del Rei Aurelio va repartir 1.275 árboles autóctonos ente los escolinos y escolines del conceyu. Tamién va poner en marcha un taller de reciclaxe.
 
705 carbayos, 450 castaños, 60 fayes y 60 abedurios, donaos pola Conseyería de Mediu Ambiente, Ordenación del Territoriu y Infraestructures, son los árboles autóctonos que’l Conceyu de Samartín del Rei Aurelio va entregar a alumnos d’Educación Infantil y Primaria pa que los planten nel conceyu. Los neños y neñes tamién van disponer d’un dípticu fechu pol Ayuntamientu nel que s’esplica cómo plantar un árbol y los beneficios qu’esta aición da a la naturaleza. Nél, tamién se señala a los escolinos que, si nun tienen finca propia, planten l’árbol nun terrén públicu desforestáu.
 
Amás, tamién con motivu de la celebración del 5 de xunu, 644 alumnos de Primaria del conceyu van poder participar nun taller de reciclaxe al traviés de Formastur que va principiar mañana nel colexu públicu El Parque (Blimea). Nesti taller, que va pasar per toles escueles del conceyu, los neños y neñes van tratar sobre’l reciclaxe domésticu y la reutilización de residuos, amás de reflexonar sobre hábitos desfavorables col mediu ambiente, ente otres coses. Estos cursinos tán enmarcaos dientro de la nomada Axenda 21 del conceyu.