Samartín del Rei Aurelio recupera’l so concursu de cancion asturiana

El Concursu de Canción Asturiana de Samartín del Rei Aurelio torna a celebrase tres un añu de parón. L’Asociación de la Canción y el Folklore Valle del Nalón dio’l pasu pa recuperar esti certame, que va reunir a 107 participantes.

L’actividá va principiar esti vienres y va allargase hasta’l 30 de mayu, con conciertos siempre nesa mesma xornada n’horariu de 19 a 20.30 hores. La entrada pa presenciar esti concursu que tien al Teatru Municipal de Samartín, en L’Entregu, como sede ye de 2 euros. Los 107 inscritos van dividise según categoríes –masculina, femenina, menor de 18 años, infantil y aficionada– pa optar al trunfu. Como novedá nesta edición, la decimosesta dende la so creación nel 1997 de la mano del Grupu de Tonada de Radio San Martín, ta la posibilidá d’interpretar temes inéditos o adaptaciones del cancioneru asturianu. Inclusive, la organización crea un premiu al cantar inéditu masculín y femenín, valoráu en 300 euros caún. L’importe total de recompenses que reparte’l concursu ye de 7.400 euros.

Les dificultaes de financiación llevaron a l’Asociación Toná y Folklore de San Martín del Rey Aurelio a treslladar nel 2013 el festival a la seronda, pero los problemes continuaron y, al final, nun pudo celebrase. Esti añu, y cola collaboración del Conceyu de Samartín, l’Asociación de la Canción y el Folklore Valle del Nalón toma’l relevu pa recuperar un concursu que busca “promocionar y difundir la producción de temes nuevos o reinterpretaos qu’arriquezan la cultura musical asturiana, xenerando oportunidaes nueves a les voces más moces pa que tamién tengan la posibilidá de desarrollase con estilos personales, como fixeron los sos antepasos”, señaló José Luis Rozada, presidente del coleutivu organizador. De momento, la respuesta de los cantantes ye más que positiva, con 107 inscritos procedentes de toda Asturies y Cantabria. 

Na semeya, un momentu del actu de presentación del concursu, nel que tuvo presente la conceyala de Cultura, Gema Suárez –col cartelu nes manes–.