Sama celebra al patrón

El próximu día 23 de xunetu escomencipien les Fiestes n´honor a Santiago Apóstol del distritu Llangreanu de Sama. Esti añu´l programa festivu preséntase atrayible pa los que vayan disfrutar de los festeyos.

A les 12 la mañana del próximu vienres el tradicional chupinazu dende´l corredor del Conceyu va anunciar l´aniciu d'unes fiestes locales nes que va lleer el pregón la conseyera de residencia del Gobiernu del Principáu d´Asturies María José Ramos Rubiera, mientres qu'ente los actos más destacaos van tar les actuaciones de la popular cantante "Merche", "Iguana Tango" y el grupu del Valle "Los Berrones" que toquen el 26, anque tamién va haber tiempu p´actividades como´l teatru, la música asturiana o competiciones deportives.

Les Fiestes de Santiago son la segunda gran cita festiva del veranu llangreanu tres de la fiesta de San Pedro. Ente los sos grandes atractivos ta la celebración del Concursu Nacional d'Entibadores Mineros, una especialidá del llabor na mina que cada vegada cuenta con menos profesionales que puedan llamase mayestros nel arte de postiar.