Salú va presentar el día 14 un modelu nuevu d’asistencia pa persones que sufren COVID-19 persistente

El conseyeru Pablo Ignacio Fernández Muñiz anunció esti llunes na Comisión de Salú un modelu d’asistencia nuevu centráu na Atención Primiria pa les persones que sufren COVID-19. Esti procedimientu afita una serie de cuidaos integraos que garanticen l’asistencia continuada del paciente yá diagnosticáu y aseguren la equidad del procesu.

El trabayu conxuntu de la Direición Xeneral de Cuidaos, Humanización y Atención Sociosanitaria, con integrantes del popio coleutivu d’afeutaos, “na so mayoría contaxaos na primer fola”, y el Serviciu de Salú del Principáu d’Asturias (SESPA) impulsen esti ‘Procesu asistencial en persones con condición post-COVID’, que busca “ordenar y establecer circuitos bien definíos de l’atención que yá se ta faciendo, con un importante pesu de l’Atención Primaria como exa fundamental pal diagnósticu”. Un modelo que contempla “la coordinación con otros niveles asistenciales según criterios de derivación”, apuntó Fernández Muñiz.

Nel procesu asistencial establezse un códigu CIAP (Clasificación Internacional de l’Atención Primaria) y un formulariu pal so rexistru na historia clínica que permita facer un siguimientu de los diagnósticos. Salú va presentar esti modelu nuevu nuna Xornada de Sensibilización y Difusión, nel marcu del plan de formación continuada pal personal sanitariu incluyíu nel Plan de Recuperación, Tresformación y Resistencia que se celebrará el día 14 nel Hospital Universitariu Central d’Asturies (HUCA) cola collaboración del Institutu Asturianu d’Alministración Pública Adolfo Posada.

Tamién ta prevista una sesión informativa pa los profesionals a cargu del direutor del área de xestión clínica de Medicina Interna del Área Sanitaria IV (Uviéu), Álvaro González Franco, y de los médicos especialistas en Medicina Familiar y Comunitaria, Rodrigo Abad Rodríguez, del Centru de Salú de La Pola Siero, y Pablo Pérez Solís, del xixonés Centru de Salú de Laviada.