Salú encamienta a siguir usando la mázcara por “responsabilidá” énte l’aumentu d'hospitalizaciones

La situación epidemiolóxica actual lleva a Salú a recomendar, un día depués de que’l Gobiernu estatal retirara la obligatoriedá del usu de la mázcara n’espacios d’interior, que la población les caltenga mientres sigan estos datos. Asturies ta en en nivel d’alerta altu por COVID-19 dende'l domingu pol aumentu de los ingresos en planta.

“Convocamos esta rueda de prensa pa tresmitir el mensaxe de la responsabilidá”, principió la so intervención Lidia Clara Rodríguez, direutora xeneral de Salú Pública, que recordó que “hai sectores de la población que siguen siendo vulnerables, que pueden desendolcar cuadros graves, como les persones d’edá avanzada o con enfermedaes inmunocomprometíes y que nun desarrollaren suficiente inmunidá contra’l coronavirus”. Asina, apuntó que “na selmana última algamamos unos niveles d’incidencia y d’actividá asistencial que nos obliguen a modular les midíes de vixilancia y de control” pa “reducir la tresmisión comunitaria que nos devuelva a un escenariu d’alerta media o baxa”.

La tasa d'ocupación hospitalaria cada 100.000 habitantes ye l’indicador que más esmolez, con 32,91 casos na selmana última. Mario Margolles, xefe de Vixilancia Epidemiolóxica, apuntó que “la mayoría de los ingresos n’hospitalización convencional son persones d’alta edá: hasta un 41 por cientu de los qu’ingresaron nestes selmanes últimes son persones de 80 y más años, y un 86 por cientu son de 60 y más años”.

Por esti motivu, Asturies plantegó al Ministeriu de Sanidá adelantar la segunda dosis de recuerdu a mayores de 80 años y residentes de centros sociosanitarios. La propuesta ta siendo valorada a nivel estatal pola Ponencia Téunica de Vacunes.

Cambiu nel criteriu pruebes diagnóstiques

Otra midida p’afrontar la situación epidemiolóxica actual ye que les pruebes diagnóstiques van facese según el criteriu clínicu del profesional sanitariu, ensin que dependa de la edá o los factores de vulnerabilidá del usuariu. Colos cambios fechos na Comisión de Salú Pública del Sistema Nacional de Salú'l 28 de marzu na Estratexa de Vixilancia y Control Frente a la COVID-19 Llueu de la Fase Aguda de la Pandemia éstes centrábense nos casos graves, en mayores de 60 años, en persones inmunodeprimíes y en muyeres qu'esperen un críu.

Nel casu de ser positivu o con síntomes compatibles cola COVID-19, Salú aconseya cumplir coles midíes de proteición yá conocíes, esto ye, llaváu de manes, distancia social, usu de la mázcara y restrinxir al máximo les sos interaiciones sociales.

Na semeye, Margolles, Rodríguez y Miguel Prieto, xefe d'Alertes y Emerxencies Sanitaries.