Salú cree "probable" que se pase al nivel más altu d'alerta por COVID-19

El conseyeru Pablo Ignacio Fernández Muñiz afirma que "yá se ta observando l'efeutu de la Selmana Santa" y insiste na recomendación de siguir usando mázcara n'espacios d'interior.

"Agora mesmo la situación epidemiolóxica ye nivel d'altu riesgu, sobre manera polos indicadores d'hospitalización y inclusive ye probable que pol efeutu de la Selmana Santa se consolide esti crecimientu hacia'l nivel de mui altu riesgu", el mayor na nueva Estratexa de Vixilancia y Control Frente a la COVID-19 Llueu de la Fase Aguda de la Pandemia, afirmó ayeri'l resposable de Salú depués de la celebración de la xunta telemática del Conseyu Interterritorial del Sistema Nacional de Salud celebráu na tarde d'ayeri. Anguaño, con datos correspondientes al domingu, tán en nivel altu dos de los seis indicadores asistenciales: la tasa d'ocupación cada 100.000 habitantes, que s'asitia en 39,04, cuando la selmana anterior taba en 32,92, y la tasa d'ocupación hospitalaria, qu'entra nesti riesgu con un 11,23 por cientu.

Por esi motivu, Fernández Muñiz llanza un mensaxe "de prudencia" y considerando que "yá se ta observando l'efeutu de la Selmana Santa, a fin d'amortiguar no posible l'efeutu de la falta de la obligatoriedá de les mázcares n'interiores, recomendamos siguir usándola". Otra manera, confirmó que nel conceyu d'ayeri tamién se trató y aprobó la Estratexa de Salú Cardiovascular del Sistema Nacional de Salud, "que dexa de ser namái d'atención sanitaria cardiovascular pa ser de salú cardiovascular con visión integral, atendiendo a la importancia de l'alimentación cardiosaludable, a los hábitos saludables, con visión d'equidá, atendiendo a les desigualdaes y con una perspeutiva de xéneru".