Salú confirma 24 nuevos casos positivos por coronavirus

La Conseyería de Salú confirmó güei 24 casos positivos de coronavirus, dos de los cualos tán rellacionaos colos biltos declaraos en Cangas y col focu mistu (llaboral-familiar) d'Uviéu.

Col nuevu casu venceyáu al biltu declaráu nel bar El Chiringuito del Pela, de Courias, los contaxos lleguen a 18. Coles mesmes, el focu mistu d'Uviéu incorpora otru nuevu positivu, polo que'l númberu total de persones afectaes xube a 6.

Per otru llau, 8 positivos son contactos estrechos de casos conocíos y otros 9 procedentes d'otres comunidaes (Madrid, País Vascu y Llión) y de Francia.

El Serviciu de Vixilancia Epidemiolóxica investiga anguaño'l restu de los casos pa establecer el so venceyu epidemiolóxicu.

Los contaxaos presenten síntomes leves y tán n'aislamientu nes sos cases.