Salú avanza toques de queda de 1 a 6 hores nos conceyos de mayor incidencia de siguir la tendencia

|
Concepción Saavedra, Pablo Ignacio Fernández Muñiz y Miguel Ángel Prieto toques de queda 4+

El toque de queda de 1 a 6 hores y límites a los axuntamientos, amás de la revisión del entamu d’eventos, son les restricciones previstes pola Conseyería de Salú pa los conceyos qu’entren en nivel d’alerta 4+, qu’han tener el preste del TSXA. De siguir la tendencia actual estes midíes podríen llegar a dellos llugares en poco más d’una selmana.

Esta fin de selmana Asturies podría entrar nun nivel mediu d’ocupación hospitalaria, esto ye, un 5 y un 10 por cientu en cama convencional y n'UCI, de manera respeutiva, que nel casu d’Asturies seríen 150 y 25 ingresaos. Nesi momentu, empezaríen a contar los díes pa que los conceyos con más incidencia cumplan les condiciones pa tar en riesgu estremu: 3 con esi nivel d’ocupación y en nivel d’alerta 4 según los criterios del Ministeriu de Sanidá y otros 3 siguíos con incidencia acumulada a 14 díes mayor de 350 casos cada 100.000 habitantes, en llugar de los 325 que se consideraben hasta la fecha.

Esta mañana, según los datos apurríos por Concepción Saavedra, direutora xerente del Serviciu de Salú del Principáu d’Asturies (SESPA), habría "108 pacientes en hospitalización convencional". Mentes, los ingresos na UCI son 22, ún d’ellos de 13 años: 15 nel HUCA y 7 en Cabueñes.

Los conceyos mayores de 10.000 habitantes van entrar depués d’estos 6 díes de manera direuta en 4+, mentes que nel casu de los menores de 10.000 Salú va valorar de manera individual cada casu. Cuando se decrete la entrada de dalgún en riesgu estremu, darréu va solicitase al Tribunal Superior de Xusticia d’Asturies (TSXA) el preste pa decretar el toque de queda y les restricciones d’axuntamientu.

Nel casu de que’l dictame sía positivu, nun se va poder circular pela cai de 1 a 6 hores nin axuntases más de 6 persones n’interior y 10 n’esterior. Amás, van revalorase los eventos multitudinarios que se van celebrar nos 14 díes siguientes “pa estudiar el so posible reafayamientu o suspensión si fora necesario”, confirmó Miguel Ángel Prieto, xefe d’Alertes y Emerxencies Sanitaries COVID-19.

Esta decisión por parte de Salú llega nun momentu de desendolcu d’una cuarta fola de “crecimientu esplosivu mui altu”, que afeuta “sobre manera a aquellos rangos d’edá con menos cobertura de vacunación”, esplicó’l conseyeru Pablo Ignacio Fernández Muñiz. Nesi sen, rescampló la importancia de tener protexíes a les persones n’edaes de máxima vulnerabilidá, “lo que pa nós yera una obligación”, superando nesi sen la media estatal.

Na semeya, Saavedra, Fernández Muñiz y Prieto.

Contador Estadistiques