Salú adelanta dos selmanes la vacunación con AstraZeneca nel grupu de 60 a 69 años

|
Viales vacunes Vaxzevria d'AstraZeneca

Esti miércoles detectáronse 61 contaxos.

La presencia de la variante delta, conocida previamente como la india, del coronavirus SARS-CoV-2 n'Asturies y la disponibilidá de más dosis de preparáu Vaxzevria d'AstraZeneca lleva a la Conseyería de Salú a adelantar de 12 a 10 selmanes la vacunación nel grupu d'edá de 60 a 69, a la que se ta dedicando esta profilaxis. Asina lo anunció esta mañana Rafael Cofiño, direutor xeneral de Salú Pública, pa informar de la situación epidemiolóxica actual.

En concreto tán confirmaos 7 casos de la delta, más contaxosa que la predominante actual, l'alfa (inglesa), yá contaxosa de por sí, en concreto 2 na zona de Xixón correspondientes a nucleu familiar y la mayoría de les restantes a un biltu escolar nel oriente. Amás hai que 30 casos sospechosos n'estudiu.

Cuartu día ensin muertos

Los datos oficiales de la COVID-19 rexistraron 61 casos nuevos ayeri, 7 menos que'l martes. La tasa de positividá asitióse nel 2,60 por cientu, con 2.693 pruebes feches, cuando la xornada anterior quedó nel 3,75 por cientu con 2.426 tests realizaos, mentes qu'a 7 díes esti porcentaxe xube del 3,11 por cientu al 3,23 por cientu.

Nun hebo que llamentar finaos por cuartu ocasión, polo que'l total de perdes nel andanciu sigue en 1.978. Tán hospitalizaos 48 pacientes con confirmación o sospecha de COVID-19, 2 más que'l día anterior, a los qu'hai que sumar otros 13 ingresaos na UCI, 3 menos.

11 biltos activos

Asturies informó a Sanidá de la esistencia de 11 biltos activos, 5 menos que la selmana pasada, con un total de 144 casos. 4 d'ellos detectáronse estos 7 díes últimos, comunica la conseyería.

Na semeya, viales de la vacuna Vaxzevria d'AstraZeneca, de la que se recibieron esta selmana 11.000 dosis.

 

Contador Estadistiques