Salgado y Areces rematen los flecos de les tresferencies autonómiques

La ministra d'Alministraciones Públiques, Elena Salgado, y el presidente asturianu Vicente Álvarez Areces, manifestaron ayeri la so intención de pesllar los trespasos de competencies al Principáu relativos a cuenques intracomunitaries de ríos y Xusticia ente avientu y xineru.

"El compromisu siempre foi facelo enantes de que fine la llexislatura", señaló Areces, quien añadió que l'anunciu oficial sobre l'alcuerdu definitivu pue producise ente avietu y xineru.

La ministra y el presidente realizaron estes manifestaciones a los periodistes na población asturiana de Torazu (Cabranes), onde fueron a inaugurar unes obres de remodelación y visitar les instalaciones del centru de servicios de la comunidá vecinal en Santolaya.

A entrugues de los periodistes, Salgado señaló en relación a los trespasos mencionaos que sólo queden "pequeños flecos" y que l'entornu de Torazu pue favorecer que les dos alministraciones algamen güei mesmu un "alcuerdu total" n'alusión al conceyu de trabayu que caltién col presidente asturianu al final del día.

La ministra, que mañana va inaugurar Tecnimap en Xixón, refirióse tamién a les actuaciones en dirixíes a que conceyos como'l de Cabranes tengan accesu a les nueves tecnoloxíes. "Nun se trata sólo de que tengan les infraestructures, sinón de que tengan la conocencia pa utilizales", señaló.

Nesti sentíu, destacó la implantación, por parte del Gobiernu, de la "alministración electrónica" pa que los ciudadanos sientan "más próximos" los poderes públicos con independencia d'onde viven.

Areces matizó que'l Gobiernu d'España ayudó "de manera estraordinaria" a Asturies pa frayar el so aislamientu nes telecomunicaciones, dando un "gran saltu que fai años yera impensable". Asina, comentó que va siguir trabayando pa que nun exista la "resquiebra dixital".