Salave protestó contra la mina

La Plataforma Ciudadana "Oro No" convocó ayeri a cientos de vecinos de Salave, Mántaras y otros llugares del conceyu de Tapia nuna concentración de protesta contra la mina d'oru a cielu abierto que la multinacional del Canadá Río Narcea Gold Mines quier abrir en Os Llagos de Silva. La manifestación d'ayeri foi el cume d'una selmana de reivindicaciones y d'apoyos, qu'incluyeron el posicionamientu del Conceyu de Tapia, nel que los trés grupos con representación (PP, PSOE y URAS) se posicionaron contra la instalación de la mina, participando l'alcalde de Tapia Gervasio Acevedo y dellos representantes políticos na concentración.

El posicionamientu de los grupos políticos Conceyu de Tapia contra la mina vieno dempués de muncha presión por parte de les asociaciones de vecinos y la plataforma escontra la mina, que criticaron muncho'l que'l Conceyu tuviere guardándose de facer un pronunciamientu claru contra la mina. Dende la plataforma "Oro no" convocante de la concentración d'ayeri, llegó a haber quexa del conceyu, del que se dixo que taba dañando l'interés de los vecinos nel procesu alministrativu al afalar la falta d'información y redactar suxerencies que se calificaron de "probes" dende la plataforma a la Memoria Resumen del proyectu mineru. Agora que'l Conceyu yá sofita oficialmente la reivindicación contra la mina, los miembros de la plataforma quieren que se dean una serie de pasos pa convertir esa refuga oficial en dalgo más qu'una declaración d'intenciones.

Dempués de la concentración d'ayeri, les reivindicaciones siguen siendo les mesmes per parte del garapiellu d'asociaciones contraries a esta mina qu'afuracaría un crater de cientos de metros de diámetru en primera llinia de la costa asturiana. La declaración cmo Bien d'Interés Cultural de Os Llagos de Silva y la so redolada y l'entamu d'una ronda de visites institucionales pa espresar a autoridaes de tou tipu la oposición al proyectu de mina son dos primeros pasos que, pa la plataforma, habríen complementase con otres midíes más actives y que llevaríen arreyáu más compromisu por parte del Conceyu, que sedríen l'usu de tolos recursos xurídicos de la corporación pa entamar batalla llegalcontra la mina y la paralización de los llabores de sondéu que yá ta faciendo la multinacional minera nel llugar au ta prevista la esplotación.

Amás de la presencia de cerca de 300 vecinos, decenes d'organizaciones de tipu políticu y ecoloxista d'otros llugares ficieron llegar a los convocantes el so sofitu a la reivindicación contra la mina, ente elles delles d'América del Sur. El siguiente pasu na movilización van dalu dellos vecinos vque an facer una visita a les mines d'oru que tien Río Narcea Gold Mines nel suroccidente asturianu. La ellaboración d'un manifiestu coles firmes de personalidaes de la cultura y la sociedá asturianes ye otru fde los pasos que se tan dando.
Más información:
ContraminaAsociación de Vecinos Ameicer
Salvemos Salave