Salamanca 0 - Sporting 0

Nun partíu que yá va camín de facese un clásicu de la segunda división, el Sporting sumó otru empate a ceros y sigue a lo cabero de la tabla y agobiáu pola pantasma del descensu a segunda b. En descargu de los de Xixón hai que dicir que ye'l primer puntu que saquen esti añu fuera de casa y que xugaron meyor qu'otres veces, confirmando la recuperación que se vió la otra selmana. Amás, l'árbitrio combayó colos salmantinos, perdonándo-yos una entrada tres d'otra a Villa, qu'acabó pidiendo'l cambeu en llevando una patada en llombu. Los charros llibraron gracies al porteru rumanu Stelea, qu'atayó les tres o cuatro ocasiones clares del equipu de Maceda.