Sal d'imprenta 'Llugares máxicos d'Asturies'

L'autor Bertu Ordiales va dar avisu a lo llargo d'esta selmana de cuándo va tar disponible nes llibreríes el so trabayu billingüe.

'Llugares máxicos d'Asturies', el llibru de semeyes de gran formatu de 60 llugares señalaos d'Asturies acompañaes de testos con histories o lleendes de los mesmos, yá salió d'imprenta. Depués de finar con ésitu la campaña de micromecenalgu popular na rede entamada a últimos de setiembre, recaudando en 40 díes 5.123 euros, 623 más del mínimu necesariu pa facer realidá'l proyeutu, los participantes na mesma podrán recibir la obra y les sos recompenses a lo llargo d'esti mes.

Ordiales anunció a traviés de la plataforma Verkami qu'esta selmana va dar a conocer los puntos de venta de 'Llugares máxicos d'Asturies'. Tamién ónde van poder recoyer los sos exemplares les persones que lu mercaren cola opción de recoyelu en tienda n'Uviéu y Xixón.