Sal a la venta'l segundu discu de Fontoria

Lleva'l títulu de 'El máxicu viaxe de Fionna de Morlay' y la banda de folk-rock progresivu va presentalu'l 11 d'ochobre en L'Infiestu.

El segundu discu de Fontoria, retrasáu pola situación provocada pola crisis sanitaria pola COVID-19, yá ta a la venta. Dende güei ta disponible en toles plataformes dixitales y pue mercase de forma física en Musicasturiana o al traviés del propiu grupu.

Nagore Goikolea (harpa, vigulín, viola, clave y pianu), José Ramón 'Navia' (gaites, xiblates, flautes de picu y curdión), Pablo Pumarada (bodhran, percusión ellectrónica, djembé y darbuka) y Maxi Areñes (voz, guitarres, baxu, teclaos, banjo, harpa, mandulina, gaita rabil y xiblates) son los componentes de la banda que ta tres esti álbum conceptual, un viaxe de 70 minutos de llargor al traviés de la mirada de la xoven Fionna. La presentación en direuto del discu va tener llugar el 11 d'ochobre, na Plaza'l Ganáu de L'Infiestu, a les 19 hores con accesu llibre con toles midíes de seguranza.