Sah.arianos acusen a soldaos y colonos de quemar les sos cases

"Centenares" de colonos marroquinos, "apoyaos por camiones del Exércitu marroquín d'ocupación", quemaron delles cases de sah.arianos nel barriu de Matalla, n'El Aaiún, según informaron fontes sah.arianes.

Dellos blogues d'activistes sah.arianos informaron dende'l terrén de que les fuerces marroquines entregaron armes anueche a los colonos, que llanzaron una contraofensiva "casa por casa", armaos con fusiles, y qu'empezaron a quemar "tolos coches de los sah.arianos y delles cases".
  
Los axentes de Policía informáben-yos de qué cases pertenecíen a sah.arianos y los colonos, según les citaes fontes, allanaron, saquiaron y quemaron les viviendes y cutieron a los sos moradores.
  
Pela so parte, el Conseyu de Ministros de l'autoconstituida República Árabe Sah.ariana Democrática (RASD) declaró esti martes "día de duelu nacional polos mártires del cobarde ataque cometíu ayeri pol Exércitu marroquín n'El Aaiún, capital ocupada del Sáhara Occidental", según SPS, l’axencia de noticies del Frente Polisariu.
  
Al aniciu de les negociaciones
El Conseyu de Ministros señaló que "esti vil actu" tuvo llugar "tres el discursu de Mohamed VI", que constituyó "una orde pa cometer esta masacre", y coincidió "cola tercer ronda de negociaciones informales ente les dos partes en conflictu, el Frente Polisariu y el Reinu de Marruecos", prosiguió.