Sadei nun ve traza de recuperación

La Sociedá Asturiana d'Estudios Económicos ta acabante d'espublizar l'avance del informe de coyuntura económica del mes de xunu. L'informe, qu'analiza la evolución de les estayes productives n'Asturies a lo llargo d'esta primer metada del añu, entama con una alvertencia que,por repetía, nun dexa de preocupar: Sadei nun alvierte qu'haya síntomes d recuperación na economía asturiana, que sigue morriendo adulces y na que namás unos pocos sectores son a caltener l'actividá. En concreto, Sadei ve na construcción ún de los motores de l'actividá nel país, pero tamién diz que se conoz que l'actividá nesta estaya ta menguando, citando la baxada na venta de cementu como índiz indiccador d'un parón suavizáu pola contratación d'obra pública, que tien un poco por ello. La crisis del turismu, minimizada nos datos apurríos pol SITA, trescala nel informe de Sadei, que yá da una baxada del 5% nel índiz de pernoctaciones que en xunu del 2001. Sicasí, la crisis más grande alcuéntrae en delles estayes del sector primariu: la pesca baxa un 25% nel valor de les captures y la ganadería, anque produz más que nunca, ve como tolos progresos que fai queden tarazaos pola baxada del preciu del llechi.Sacantes estos datos esmolecedores, l'informe espeya datos contradictorios de pequeñes xubes y baxes según sectores que demuestren lo al debalu que va l'actividá económica n'Asturies. Sicasí, ente lo poco que xube nesti estudiu de Sadei rescampla la producción eléctrica. Asturies, produxo'l 6,9% más de corriente que en mayu y ná menos que'l 49% más d'electricidá que nel mesmu mes del 2001.