Sabel Tuñón va falar sobre’l movimientu vecinal na Tertulia Enrique García-Rendueles

La Tertulia Enrique García-Rendueles, organizada pola asociación N’Ast y l’Atenéu Cultural Xuan María Acebal, va tar dedicada esta selmana al movimientu vecinal. Sabel Tuñón ye la convidada d’esti xueves en L’Ayalga.
 
Tuñón, vicepresidenta n’actualidá de l’Asociación de Vecinos de Vega-La Camocha, coleutivu que presidió años atrás, va ufrir una charra col nome ‘Movimientu vecinal; faciendo asturianismu dende los barrios’, na que va contar la so esperiencia nel tiempu que lleva participando nél. Va ser a les 20 hores en L’Ayalga (cai Decanu Prendes Pando 11, Xixón) y tres la so intervención va abrise un alderique.
 
Activista n’asociaciones ciudadanes, culturales y polítiques, Tuñón ye una persona bien conocida nel asturianismu. Foi fundadora del Partíu Asturianista y nos 80 tuvo na asociación Andecha Asturianista. N’actualidá ye miembru d’El Garrapiellu y autora de cuentos pa neños y neñes de 0 a 3 años, amás d’otros trabayos, como un llibru sobre Andrés Solar o una guía sobre la parroquia de Deva. Nel ámbitu políticu, forma parte de la candidatura del Bloque por Asturies-Unidá Nacionalista Asturiana (UNA) pa Xixón.