Saavedra: “La ironía y l’humor continúen siendo un componente estructural de la nuesa identidá”

|

El filólogu Ricardo Saavedra Fernández-Combarro protagonizó la tercer conferencia de la Universidá Asturiana de Branu (UABRA), qu’impartió en fala. Nella analizó, con exemplos, lo que queda del inxeniu y sentíu del humor de los asturianos.

‘A ironía y el humor na formación discursiva da cosmovisión asturiana’ yera’l nome definitivu d’esta charra cola que Saavedra pretendía comprobar si’l tópicu de la ironía y el sentíu del humor de los asturianos continuaba vixente. Pa ello, el filólogu y músicu foi analizando énte’l públicu presente nel salón d’actos del IES Cangas del Narcea conversaciones espontánees nos medios de comunicación y dellos exemplos tanto na prensa escrita, como na pintura, lliteratura y música, en gallego-asturiano y n’asturianu. La conclusión a la que llegó Saavedra ye que “ye verdá que la ironía y l’humor continúen siendo un componente estructural de la nuesa identidá”, que configura “una forma d’entender el mundu”, la cosmovisión de los asturianos.

El baxu de Bacotexo acudió esti añu per primer vegada como profesor y conferenciante a la UABRA. “Pa min ye dalgo chocante, porque yo tuve equí hai 12 años como alumnu del cursu avanzáu d’asturianu y hai unos años col grupu”, esplica Saavedra, encantáu cola posibilidá que-y dio esti añu l’Academia de la Llingua Asturiana de dar clase de Música y Lliteratura nel cursu d’afondamientu de fala. No que respeuta a la UABRA, el vecín d’A Caridá nacíu n’Uviéu afirma que ye “una esperiencia mui arriquecedora” al xuntar “xente de d’ámbitos diferentes y intereses diferentes con un nexu común, la llingua y la fala”. Asegura tamién qu’esta iniciativa ye “perimportante” pol fechu de xunir les dos llingües y amuesa que dambes “tán mui vives pese a a les torgues puestes polos políticos; la xente mozo sigue prendiendo la llama”.

Estrena de ‘Charada (Charade)’

El Teatru Toreno va acoyer esta nueche (22.30 hores), dientro de les xeres complementaries y abiertes de la UABRA, la proyeición per primer vez de la versión asturiana de ‘Charade’, de Stanley Donen. ‘Charada’, nome que recibe n’asturianu, tratáse d’una película estauxunidense rodada nel 1963 qu’amesta rasgos de thriller colos de comedia romántica: Regina, tres unes vacaciones nuna estación d’esquí, onde conoz a un home encantador, torna a París cola decisión de divorciase del so maríu, pero cuando llega a la capital del Estáu francés la Policía informa-y que lu asesinaron. Trés son los homes sospechosos de matar al maríu de Regina en busca d’una fortuna que, en teoría, taría en manes del difuntu pero que, en realidá, pertenez al Gobiernu de los Estaos Xuníos.

Gonzali Producciones entamó'l doblaxe d’esta cinta, que se desendolcó nel Estudiu Fase Cuatro. Illán Gonzali fixo’l llabor de productor executivu, Humberto Gonzali encargóse del guión y los actores de doblaxe, baxo direición d’Antón Caamaño, foron Andrés Presumido (Cary Grant), Arantxa Fernández (Audrey Hepburn), Jorge Moreno (Walter Matthau), Caamaño (James Coburn), Carlos Novoa (George Kennedy), Ana Viñuela (Dominique Minot), Berto Peña (Ned Glass), Fernando Marrot (Jacques Marin), Carlos Rodríguez (Paul Bonifas), Norberto Sánchez, Hugo Gacía, Vanesa Rodríguez Touza, Félix Corcuera, Inma Rodríguez y Izar Gayo.

 

Contador Estadistiques