Sánchez Vicente: “Hai que pensar muncho qué facer; ensin medios ye complicao siguir”

Unión URAS-PAS algamó los peores resultaos de la so historia nestes eleiciones, en parte motivaos pola entrada de FAC na escena política. Xuan Xosé Sánchez Vicente reconoz los malos resultaos y señala “qu’hai que pensar muncho qué facer”.
 
“Ensin medios económicos y propaganda ye mui complicao algamar resultaos. Nesta campaña, los medios de comunicación tratáronnos mui mal y esa foi una de les razones d’estos malos resultaos”, señaló Sánchez Vicente. El políticu xixonés tamién reconoció qu’otra causa foi la entrada na escena política de Foro Asturias Ciudadano (FAC), que llevó una parte de los votos de Unión URAS-PAS. “Agora hai que pensar muncho qué facer porque ensin medios nun hai forma de conseguir nada”, señaló’l presidente del Partíu Asturianista (PAS) en relación al futuru de la coalición. Nestos momentos la Unión URAS-PAS mantién dos conceyales, ún en Valdés y otru en Bimenes.
 
Respeuto al resultáu eleutoral, el candidatu d’Unión URAS-PAS señaló que “los grandes derrotaos son PSOE y PP pola entrada del partíu de Cascos”. Tamién comentó que n’Asturies “va gobernar el PP pero d’otra forma, porque toles cares que se veíen en Foro Asturias yeren del PP”, y mostró la so desconfianza en que FAC pudiere facer polítiques asturianistes “pese a la presencia de dalgunos asturianistes conocíos” na formación lliderada por Francisco Álvarez-Cascos.
 
Otra manera, Sánchez Vicente quinxo agradecer l’esfuerzu “a tolos candidatos del partíu, a la militancia y a tola xente que nos ayudó nesta campaña eleutoral”.