Ryanair aterriza n’Asturies pa xunir l’aeropuertu de Santiagu'l Monte colos de Madrid y Barcelona

La compañía irlandesa Ryanair va operar dende l’Aeropuertu d’Asturies dende’l 3 d’abril. L’aerollinia de baxu coste vien a tapar los güecos que dexa Spanair tres el so pieslle, yá qu’ufiertaba dos vuelos diarios a la capital catalana.

Años atrás, Spanair tamién volaba a  Madrid, ruta na qu’anguaño namái opera Iberia tres la retirada d’Air Europa y la qu’agora tamién se suma Ryanair, lo que permite a los asturianos volar a la capital castellana con unos precios económicos. En principio, van instaurase dos vuelos diarios a Barajas, anque de momentu namái tán a la venta billetes pa volar a El Prat. La situación col aeropuertu catalán yera diferente a la de Madrid, yá que Vueling y Spanair repartíense la ruta. Agora, la filial d’Iberia de ‘low cost’ tendrá que ponese les piles pa nun perder clientes ante la competitividá alta que supón la aerollinia irlandesa, que permite volar nestos momentos nel mes de mayu a Barcelona por unos 50 euros, tases incluyíes.

Michael Cawley, vicepresidente de Ryanair, foi la persona encargada d’anunciar la llegada de la compañía al aeródrumu de Santiagu’l Monte nuna rueda de prensa celebrada ayeri en Barcelona. Nella aprovechó pa cargar contra AENA y les sos tases aeroportuaries altes, de les mayores d’Europa y el norte d’África, y dixo que tendría qu’aprender la lleición tres la quiebra de la carta aerollinia del Estáu.