Una ruta va percorrer los puntos claves de la Revolución d'Ochobre del 34 n'Uviéu

El día 5, domingu, cúmplense 80 años del aniciu de la Revolución d'Ochobre del 34. Nesa xornada va entamase una ruta guiada n'Uviéu pelos puntos claves del llevantamientu obreru na ciudá.

La Fundación Juan Muñiz Zapico, cola collaboración de CC OO d'Uviéu y Izquierda Xunida d'Uviéu, ye la responsable de la creación d'esta ruta tres la constitución d'un equipu interdisciplinar formáu pol historiador Rubén García Riesgo, coautor del llibru sobre Los Mártires de Villafría; el xeógrafu Adrian Gayo Rodríguez; y el Cursu de Promoción Turística Llocal y información al visitante de FOREM, a cargu de la profesora Sandra Martínez Salvador. "La idea d'esti proyeutu ye combinar dellos campos, la historia, la xeografía y el turismu, dando llugar a una ruta y un planu que permitan el so usu turísticu y memorialista, ensin otru oxetu que ser aportación al conocimientu de la ciudá d'Uviéu, tanto de residentes como de visitantes", espliquen dende la fundación.

Esti domingu va ser posible facer la ruta xunto con un guía a partir de les 11 hores, con salida del campus del Milán. L'itinerariu propuestu ye'l siguiente: c/ Teniente Alonso Martínez, c/ Marcelino Fernández (Fabrica d'Armes), c/ Martínez Vigil, Conventu de Les Pelayes, c/ San Vicente, Corrada del Obispu, Travesía Santa Bárbola,· plaza Alfonso II (catedral),  plaza El Porlier y Edificiu Históricu de la Universidá d'Uviéu, ·c/ Mendizábal, c/ Argüelles (Santa Clara y Teatru Campoamor), plaza Escandalera, c/ Uría , c/ Fruela, c/ Xesús y plaza de la Constitución, c/ Fierro y plaza El Fontán.