Rusia va firmar el protocolu de Kyoto

El presidente rusu, Vladimir Putin, afirmó ayeri nel cume rusu-européu que va acelerar los esfuerzos para que'l so país soscriba'l Protocolu de Kioto sobre emisiones contaminantes
Pa que'l Protocolu de Kioto entre en vigor ye preciso que lu soscriban un númberu de países que sumen ente toos ellos el 55% de les emisiones contaminantes na tierra. Rusia, que tien el 17% d'estes emisiones, yera'l noyu de la validación definitiva de Kyoto, en cuantes que l'otru gran estáu emisor, los EEUU, yá dieren anuncia de que nun contaben con firmar el documentu.

Con ello, la firma de Rusia convirtióse nuna llave pola que los grupos conservacionistes esperaben dende más de dos años

El Protocolu de Kioto permite que los países industrializaos puedan vender y comprar derechos d'emisiones contaminantes, garrando como añu de referencia base'l 1990, cuando entovía esistía la URSS, estáu de consumos y emisiones enormes. Al francer el bloque soviéticu, los actuales estaos heriedes de la URSS tienen una industria y unes emisiones mui menguaes, colo que Rusia y Ucrania, ente otros, contaben con vender los derechos d'emisión que nun utilizaren a terceros países. Precísamente'l "preciu de venta" d'esos derechos sobrantes, que Rusia quier que seya lo más altu posible, ye ún de los factores que más tan retrasando la firma del Protocolu.

Entovía más, Rusia contaba de mano con vendé-y esos "derechos de emisión" a Estados Unidos, pero la negativa de l'Alministración Bush a ratificar el Protocolu dexaron a la Rusia post-comunista ensin un importante veceru. Rusia mira agora a la Unión Europea como posible destinatariu d'esi CO2 que-y sobra

Firmáu en 1997, el Protocolu de kioto obliga, en llegándose a un quorum de firmantes, a que los países más industrializaos del mundu mengüen el 5,2% les emisiones a l'atmósfera sobre la base del añu 90, ello ensin obligar a los países non industrializaos nuna primer fase. Con ser firmante, España xubió ente 1990 y el 2003 les sos emisiones nun 40% cifra que triplica incluso l'oxetivu de nun pasar del +15% col que se comprometió España cola Europea