Ruma Barbero pon un taller de cómic n'asturianu en Llanera

Va celebrase tolos miércoles de febreru a mayu na Casa Participa de Posada.

Ruma Barbero, ún de los meyores dibuxantes d'Asturies, como amuesen los sos trés Alfonso Iglesias de cómic, l'últimu na edición del 2019 por 'Seltegu', pon un taller de cómic n'asturianu en Llanera de baldre. Destináu p'adultos y mozos mayores de 12 años, trátase d'una iniciativa entamada pol Serviciu de Normalización Llingüística de Llanera.

Les clases van celebrase tolos miércoles, de 17 a 19 hores, nel Espaciu Mozu de la Casa Participa dende mañana hasta mayu. Les persones interesaes n'inscribise pueden facelo presencialmente nel propiu centru de Posada, al traviés del corréu electrónicu normalizacionllinguistica@llanera.es o del númberu de teléfonu 985.77.30.05.