Rubiera reivindica la presencia de la sidra asturiano n'actos oficiales y celebraciones sociales

Carlos Rubiera reivindicó la celebración de cualquier actu institucional o social con sidra asturiano na presentación del I Salón Internacional de Sidres de Gala. Esti eventu va celebrase’l día 28 y busca promocionar estes bébores.
 
“Ye imprescindible pa los asturianos que tomemos conciencia de que la celebración de cualquier actu institucional o social debe tener la compaña de la sidra asturiana y non de cualquier otra bebida”, señaló’l conceyal de Cultura de Xixón na so intervención na presentación celebrada esta mañana nel Centru de Cultura Antiguu Institutu. “Ye lo nuestro y hai que potencialo”, continuó Rubiera, que taba acompañáu por Xosé Nel Riesgo, direutor de la Fundación Municipal de Cultura, Educación y Universidá Popular de Xixón, y de Llucía Fernández Marqués, coordinadora del I Salón Internacional de Sidres de Gala, actividá entamada pola Fundación Asturies XXI y la revista La Sidra en collaboración cola Conseyería d’Agroganadería y la Conceyalía de Cultura.
 
Al respeuto de la so reivindicación, l’l edil recordó que’l Conceyu de Xixón “tien vezu” d’utilizar la sidra que los organizadores del eventu previstu pal vienres próximu nel Hotel Villa de Xixón denominen de gala “de forma mui acertada”, esto ye, la sidra brut, l’axampanada, la de mesa, la de xelu y los aguardientes de sidra, en gran parte de los actos qu’entama. Asina, destacó qu’en toles bodes civiles que se celebren na Casa Conceyu bríndase con sidra asturiano. D’igual forma, Rubiera fixo mención el sofitu que’l so partíu, Foro Asturias Ciudadano, “da a la sidra y la cultura sidrera” tanto en Xixón como n’Asturies. “Trátase d’un sector con una importancia enorme y grandes posibilidaes d’espansión”, añadió, pa depués amosar l’apoyu de la Comisión Permanente de Cultura de la Xunta Xeneral, creada’l miércoles y de la que forma parte, a la sidra asturiano y a la candidatura p’algamar el títulu de Patrimoniu Inmaterial de la Humanidá qu’entamó la Fundación de la Sidra.
 
Pela so parte, Riesgo eloxó “la iniciativa d’Asturies XXI” cola puesta en marcha d’esti primer salón de sidres de gala y reclamó la necesida d’esta bébora “d’abrir mercaos nuevos y cumplir papeles sociales nuevos”. El presidente de la Fundación Municipal de Cultura tamién destacó la importancia del sector agroalimentariu asturianu, “que caltién el paisaxe” y da “emplegu estable”, yá que recordó que “9.000 asturianos” trabayen nel campu. Asina, en chancia, afirmó que yeren necesarios “menos ocalitos y más pumares”.
 
Un certame mui européu
 
El I Salón Internacional de Sidres de Gala trátase d’un certame del estilu del que se celebren nel restu d’Europa, “estremáu de lo que tamos avezaos n’Asturies”, señaló Fernández Marqués, que destacó la importancia d’esti salón pa la promoción d’esta sidra non escanciable de tan alta calidá. Asina, les persones que s’averen el vienres al Hotel Villa de Xixón van poder prebar una variedá grande d’estes bébores, tanto de les feches nel nuesu país como una muestra d’otres ellaboraes n’Alemaña, Cymru, Éire, República Checa, Inglaterra o Normaundie, a lo llargo d’una cena gourmet compuesta por dellos platos ellaboraos por profesionales con productos asturianos seleicionaos de manera espresa pa esta ocasión. Con cada platu van presentase los ingredientes utilizaos pal mesmu y propondráse’l maridaxe con dos sidres presentaes polos propios llagareros.
 
Fernández Marqués tamién reivindicó “el potencial grandísimu que tien esta sidra asturiano, non sólo dientro del país, sinón en toda Europa”, y reclamó la so presencia en tolos actos oficiales que se celebren n’Asturies en sustitución del vinu español o del cava, mui habituales nos eventos institucionales entamaos dende’l Gobiernu. D’igual forma, la coordinadora del salón quinxo dexar claro qu’esta apuesta por la sidra de gala “nun ye facer de menos a la sidra tradicional, que consideramos que ye suficientemente conocida”. Sicasí, la sidra natural tamién va tener sitiu nel certame, yá que, a la entrada, los asistentes van poder beber unos culinos.
 
El comienzu del actu ta previsto pa les 20 hores y p’asistir ye requisitu reservar con antelación na direición info@lasidra.as o nel teléfonu 652.594.983 y facer un pagu de 40 euros, qu’inclúi la cena gourmet y les degustaciones de toles sidres participantes. Enantes del eventu, al que van asisitir profesionales del sector y prensa especializada, va proyeutase’l documental sobre la sidra ‘Procesual’.