Rubiera alvierte que nenguna entidá pue tener “parafuncionarios”, en referencia al Conseyu de la Mocedá

El conceyal de Cultura de Xixón, Carlos Rubiera, afirmó que’l Conseyu de la Mocedá tuvo un “ciertu privilexu” y alvirtió que nun pue pretender mantener “parafuncionarios”. La entidá va echar el pieslle’l día 1 de xineru polos recortes.
 
Rubiera reconoció que la partida pal Conseyu de la Mocedá de Xixón mengua en más del 60 por cientu, pero destacó que la previsión ye de 100.000 euros de subvención, lo qu’equivale a la quinta parte de la partida d'ayudes de la Fundación Municipal de Cultura, Educación y Universidá Popular p’asociacionismu dientro de la convocatoria xeneral. El conceyal insistió nel "ciertu privilexu" que tuvo’l Conseyu hasta la fecha y añadió que "tendrá qu’esplicar por qué con 100.000 euros nun se pue facer l’actividá y tendrán que pesllar". Nesi sen, incidió en qu’igual ye que se pretende tener "una especie de cuerpo de parafuncionarios del Ayuntamientu nel ámbitu asociativu".
 
D’igual forma, calcó que dende la entidá nun pueden pretender que’l Conceyu garantice los puestos de trabayu d’entidaes que nun son parte del propiu Consistorio y reiteró que, pese a la rebaxa, van recibir una subvención de 100.000 euros, una cantidá insuficiente pa los responsables del Conseyu de la Mocedá. Na so páxina web mantienen una esquela qu’anuncia’l zarru pal 1 de xineru “por causa de los recortes fechos pol Ayuntamientu de Xixón, gobernáu por Foro Asturias” que “afeutan al total de los alcuerdos económicos que la entidá mantenía” col Conceyu.
 
Na so intervención pa presentar los presupuesto del so área de trabayu, Rubiera tamién fixo referencia a la ‘Semana Negra’ pese a nun depender de manera direuta de la so conceyalía al ser un compromisu del equipu de gobiernu cola asociación que la organiza. El festival ta pendiente d’una reunión del Conceyu con Paco Ignacio Taibo II y, al ser una cuestión específica, de llegar a un alcuerdu habría una modificación presupuestaria.
 
Menos perres pal Teatru Xovellanos
 
Entes les partíes avanzaes por Rubiera destaca la reducción de 1.504.530 euros d'aportación municipal al Teatru Xovellanos. L'edil aseguró que se prevé que nun haya déficit más allá del previstu, "una apuesta valiente y arriesgada" qu'atribúi'l so posible ésitu "a la xerente gracies a una xestión rigorosa, clara, tresparente y responsable". L'aportación sería de 2.706.400 euros pa compensación de perdes sólo, ensin suplementos. "Hai que poner los pies na tierra" y nun tratar de competir con ciudaes como Madrid o Barcelona, sinón ofrecer actividaes “prestoses”. "Más allá de los Pirineos, el 99 por cientu de la población del mundu va tener qu'entrar en Google pa saber ónde ta Xixón", repostió.
 
Rubiera tamién faló del Festival Arcu Atlánticu, con una asignación de la Fundación Municipal de Cultura de 100.000 euros, a los que se sumen otros 100.000 de la Conceyalía de Desarrollu Económicu y Emplegu, y otres fontes esternes de financiación. Esti eventu va celebrase ente’l 21 y 29 de xunetu y nun va llevar la etiqueta celta porque lo que se pretende ye que nun sía namás un certame cultural, sinón que torne a Xixón en puntu de referencia d'intercambiu tamién económicu del norte de la Península Ibérica aprovechando les llinies martítimas con Breizh y, nel futuru, con Éire. Ente les sos actividaes anunció un foru empresarial
 
No que se refier a la so conceyalía nel so conxuntu, el presupuestu total suma 27.308.400 euros, un 0,71 por cientu menos con rellación a la suma d'estes mesmes árees de xestión nel 2011 –enantes dividíes en cuatro conceyalíes–. Al xuiciu de Rubiera, fíxose un esfuerzu en primar servicios sociales y promoción económica y emplegu, ensin dexar de llau l'apoyu a la cultura.