Rubén acabó col Sporting

El Sporting aguantó un cuartu d'hora nel Martínez Valero, tiempu en que l'equipu asturianu mandó nel xuegu y tuvo ocasiones p'adelantase nel marcador, pero dempués d'un cuartu d'hora espectacular, l'equipu asturianu perdió fuelgu. Un saque de corner que nadie nun acertó a despeyar nel Sporting y que Txiki metió a gol dio-y al Elche nel minutu 22 la ventaya que precisaba pa mandar nel xuegu a un Sporting que diba menguando al cocer y que resistía mui malamente les contres del equipu rival.

L'equipu asturianu arrancó nel segundu tiempu a tou trapu pa forzar l'empate, pero'l Sporting diba quedar bien ceo con un xugador menos al apreciar el refri Pérez Lima que Gerardo lu quixere engañar tirándose nel área pa sonsañar un penalti. Con ún menos, llegó'l segundu gol del Elche nuna gran xugada de Rubén, que dexó la pelota atrás pa que Nino remachare a puerta vacia. Ehí acabó'l Sporting, que recibió'l castigu del tercer gol, obra de Rubén al sacar una falta, y la segunda espulsión al recibir Pablo Álvarez la encarnada directa por una entrada mui fea a Nino. Peragón remachó al Sporting con un frayu dende la frontal del área que Roberto nun pudo nin goler. Los últimos diez minutos l'Elche conformóse y nun quixo facer más sangre d'un Sporting vencíu dafechu.