RTPA emitió 349 hores n’asturianu nel primer semestre, un 10 por cientu de la programación

“Ye una cantidá modesta, pero importante”, consideró Francisco González Orejas, direutor xeneral en funciones de la RTPA, na so comparecencia na Xunta Xeneral, onde reclamó la ellaboración d’un mandatu marcu qu’afite los porcentaxes de programación. Informó que l’ente emitió n'asturianu 349 hores y 30 minutos nel primer semestre del añu, lo que supón un 10 por cientu del total.

Ciudadanos y Podemos solicitaron la comparecencia del periodista un añu depués de la presencia última na Cámara, tamién a pidimientu d’estos dos grupos. El diputáu Rafael Palacios, de la formación morada, entrugó-y pola situación del asturianu na Cámara, calcando en cuestiones como’l tratamientu que se fai del idioma, los minutos d’emisión de noticies n’asturianu nos informativos o l’ausencia de programación infantil.

“Sacando esceiciones honroses, sigue ufriéndose una mirada mui sesgada delles ocasiones, raspiando lo folclorizante cola cultura asturiana entendida ampliamente”, afirmó’l de Ciañu, que demandó un tratamientu “dignu” al traviés “de conteníos culturales y musicales, con espacios destinaos a la infancia, l’adolescencia y la mocedá, como tamién la imprescindible presencia de les llingües propies d’Asturies nos informativos diarios”. “Nun comparto la so opinión sobre l’usu trivial del asturianu”, principió González Orejas, que fixo un repás a los programes que se tán emitiendo anguaño na RPA y TPA.

Sobre los espacios infantiles apuntó que “l’ecosistema audiovisual camudó nos años últimos y yá cuasi nenguna televisión xeneralista tien espacios especificamente dedicaos al públicu infantil porque hai cadenes especializaes”, rescamplando darréu que “nun tendría nengún problema en tener horariu infantil, pero ye un güecu difícil de llograr”. Centrándose nos informativos, señaló que “hai un problema d’orixe” pol fechu de que “nun se requirió’l conocimientu del asturianu por parte de los redautores” cuando se sacaron les places, lo que fai que los trabayadores “nun puedan redautar noticies en llingua asturiana” magar los cursos entamaos pola canal.

“Si m’entruguen personalmente si creo que nos informativos de RTPA debería d’haber presencia del asturianu más allá de lo que facemos simbólicamente na Selmana de les Lletres, etc., la mio respuesta ye positiva”, afirmó, pa depués esplicar que “tamos introduciendo gradualmente pieces n’asturianu, lo que nun asocedía nel pasáu”. Nesi puntu esplicó que parte de los 100.000 euros de la Conseyería de Cultura, Política Llingüística y Turismu aporta al ente, “que ye’l 0,3 por cientu del nuesu presupuestu”, se destina a publicidá y que “namái’l conxuntu del presupuestu de ‘Pueblos’ y ‘Pieces’ supera con muncho esos 100.000 euros”.

Renovación de los equipos

El porcentaxe d’emisión n’asturianu en RTPA nel primer semestre d’esti añu foi del 10 por cientu del total. “Les hores de programación total foron 3.388 hores y 46 minutos; si escluyimos publicidá, informativos y deportes, son 2.698 hores, y les d’emisión n’asturianu, de 349 hores con 30 minutos. Ye una cantidá modesta, pero importante”, aseguró González Orejas.

Nesti puntu insistió nun aspeutu col que comenzara la so intervención primera frente a los diputaos, la creación “d’un mandatu marcu, que ye un documentu d’oxetivos. Los trabayadores de la casa y la direición de la cadena sentiríamonos con unes bases más sólides d’actuación si non estableciesen porcentaxes de programación, dedicaos a cultura, educativos, n’otres llingües, etc”.

Na so comparecencia, ente otros munchos temes trataos, informó sobre la próxima renovación de los equipos de televisión, condición indispensable pa poder emitir más allá del 1 de xineru del 2023, cuando va ser obligatorio facelo n’alta definición. “Tamos nesti momentu licitando, per aciu un procesu que se llama de diálogu competitivu, porque ye una renovación mui compexa, y amás presentamos esti proyeutu énte’l Ministeriu d’Asuntos Económicos y Tresformación Dixital intentando que fora incluyíu en dalgunos de los fondos europeos d’aquello que ye conocío como NextGeneration”, esplicó.